- 2022 jyldyń maýsym aıynan beri «Astana» basketbol klýbynyń bas bapkeri qyzmetin atqarǵan Oleg Kıselev óz ornyn bosatty. Onyń ornyna Fotıos Takıanos keldi. 55 jastaǵy grekııalyq maman 1994 jyly PAOK-pen birge Korach kýbogin oljalady. 2004 jyldan beri jattyqtyrýshylyq qyzmette. Sol kezden beri óz elinde, Qatar, Kıpr jáne Kosovoda eńbek etti. 2021/22 jylǵy maýsymda Takıanos Grekııanyń eń bilikti bapkeri dep tanyldy.
- Fılıppınniń Nıý-Klark Sıtı qalasynda sý sportynan úsh jas ereksheligi boıynsha shymyldyǵy túrilgen Azııa chempıonatynda Qazaqstannyń 21 sportshysy óner kórsetip jatyr. Jarystyń alǵashqy kúni jerlesterimiz birneshe júldege qol jetkizdi. Atap aıtsaq, Adelaıda Pchelınseva, Ksenııa Ignatov jáne Egor Popov syndy júzýshiler jeńimpaz atandy. Sol sport túrin serik etken Dıana Tasjanova jáne sınhrondy sekirýshilerdiń Dıana Jumaǵulova men Anabella Kochkına juby kúmispen kúpteldi.
- El arasynda «Sport Oskary» degen ataýǵa ıe bolǵan «Laureus World Sports Awards» júldesinen úmitkerlerdiń esimderi belgili boldy. Qazirgi kezde dýaly aýyzdy mamandardyń ózderi «Jyl sportshysy» atalymynda kimniń ozatynyn dóp basyp aıta almaı otyr. О́ıtkeni alty úmitkerdiń barlyǵy da – kil myqtylar. Olar – fýtbolshy Lıonel Messı (Argentına) men Erlıng Holand (Norvegııa), «Formýla 1» dodasynyń úsh dúrkin jeńimpazy Maks Ferstappen (Nıderland), syryqpen sekirýshi Arman Dıýplantıs (Shvesııa), tennısshi Novak Djokovıch (Serbııa) jáne jelaıaq Noa Laıls. Áıelder arasynda bul ataq aıaqdop sheberi Aıtana Bonmatı (Ispanııa), tennısten álemniń birinshi raketkasy Iga Shvıontek (Polsha), taý shańǵyshysy Mıkaela Shıffrın (AQSh) men Sherıka Djekson (Iаmaıka), Feıt Kıpegon (Kenııa) jáne Sha’Karrı Rıchardson (AQSh) syndy jeńil atletterdiń birine buıyrady. Atalǵan júldeni tabys etý rásimi 24 sáýirde Madrıdte ótedi.
- Ázerbaıjannyń bas shahary Bakýde ótken batýtta sekirýden Álem kýboginiń kezeńdik básekesinde Danıl Musabaev pen Pirmammad Álıev juby kúmis medaldi moınyna ildi. Bas júlde Qytaı sportshylaryna buıyrsa, AQSh ókilderi qolaǵa qol sozdy.
- Qurlyqtyq hokkeı lıgasyndaǵy (QHL) sońǵy kezdesýinde «Barys Novosibirdiń «Sıbır» klýbyn 1:0 esebimen qapy qaldyrdy. Jalǵyz goldyń avtory – Arkadıı Shestakov (27-mınýt). Biraq bul jeńiske jankúıerlerdiń kóńili tolmady. Sebebi 68 oıynda nebári 50 upaı jıǵan jerlesterimiz turaqty birinshiliktiń jarys kestesinde 22-orynda qalyp qoıdy. Artymyzda – Podolskiniń «Vıtıazy» ǵana. Sonyń saldarynan olar pleı-off saıystaryna qatysyp, Gagarın kýbogi úshin talasý múmkindiginen aıyryldy. Bul – «Barystyń» QHL-daǵy eń sátsiz maýsymy.
- Azııa kýboginiń irikteý týrnırinde Qazaqstan basketbolshylary syrt alańda Qatar quramasymen kúsh synasty. О́te shıelenisti ótken kezdesý 73:68 (12:19, 25:14, 13:15, 18:25) esebimen jerlesterimizdiń paıdasyna sheshildi. Bul – Evgenıı Ovsıanıkov jattyqtyratyn komandanyń osy jarystaǵy ekinshi jeńisi. Buǵan deıin Úndistandy utqan edi. Osy tabysy arqyly olar Iran quramasymen birge birinshi jáne ekinshi oryndardy ózara bólisip tur.
