Foto: avtordan
Ibragım Hakımov - 5512 áskerı bóliminiń qatardaǵy jaýyngeri
Osydan jıyrma eki jyl buryn meniń otbasym Qazaqstanǵa Sheshenstandaǵy azamattyq soǵystan bas saýǵalap kelgen edi. Árıne, týǵan elin tastap ketý meniń ata-anam úshin ońaıǵa soqpady. Ishki qaqtyǵystardan kúıisi ketip, berekesi qashqan olardyń tyǵyryqtan shyǵar basqa joly bolmasa kerek-ti. Nege ekenin bilmedim, el shyǵysyndaǵy Semeı qalasyna qonys aýdarypty. Tarǵyl taǵdyr taýqymeti tar jol, taıǵaq keshtirgenimen tamyryn tereńge jaıǵan tańsyq ólkede tynystary tarylmapty. Sharýada shashaý shyǵarmaıtyn ákeshim qııýyn qıystyryp bir isti dóńgeletip áketse kerek. Áıteýir, men kóılegi kók, qaryny toq otbasyda ómirge keldim. Semeı jurtqa birden baýyr basyp kettik. Bul keýdemizden ıtermeı, qushaq asha qarsy alǵan jergilikti jurttyń daladaı keń peıilinen bolsa kerek. Sondyqtan qıyn-qystaý shaqta qoldaý tanytqan semeılikterge aıtar meniń alǵysym sheksiz. О́z balasynan kem kórmeıtin qala turǵyndaryna rızashylyqtan basqa alyp-qosarym joq. Men qorshaǵan qarashanyń qaıyrymdylyǵynan bolar, meniń de Otanǵa degen mahabbatym sondaı ystyq. Sondyqtan bolar, buǵanam bekip, qabyrǵam qataıǵan tusta, belimdi bekem býyp Ulttyq ulan qatarynda Otan aldyndaǵy boryshymdy óteýdi jón sanadym. Darhandyǵy dalasynan daryǵan qazaq jurtymen alǵys kúnin atap ótip, beıbit eldiń aspanynda mamyrajaı kún kesheıik.
Bekzat Shermatov - 5511 áskerı bóliminiń qatardaǵy jaýyngeri
Qazaqtyń mańdaıyna bitken jaryq juldyzy, alyp oıdyń ıesi, hakim Abaı Qunanbaıuly «qarny toqtyq, kóılegi kóktik, jumysy joqtyq azdyrar adam balasyn deıdi» Iá, jegeni aldynda, jemegeni artynda qalǵan jannyń toǵysharlanyp, ómir súrýge degen qulshynysynan aıyrylary haq. Degenmen, kóılegiń kógermeı, jumyssyz júrseń – qý turmystyń kúıbenine túskeniń bolyp esepteledi. Mine, meniń áke-sheshem de Qyrǵyzstanda bala-shaǵasyn asyraýǵa laıyqty, mardymdy nápaqa alatyn jumys tappaı sendeldi. Ol jaqtaǵy bizdiń aýyl turǵyndary tabysty bolamyn dep Máskeýge sabylsa, al biz Qazaqstandaǵy Pavlodar qalasyna taban tiredik. Anamdy tańqaldyrǵan bul sheshimdi ákem qabyldapty. Alǵashynda páter jaldap kúnelttik. Sodan keıin saýdamen aınalystyq. «Eńbek etseń emersiń» demekshi, eshkimdi tanymaıtyn ólkedegi shelektep tógilgen ter sońynda óz jemisin berdi. Búginde áke-sheshem Pavlodar qalasyndaǵy birneshe kásiptiń ıesi atandy. Endi Astana qalasynan da bıznes kózderin ashyp, elordaǵa oıysýdy josparlap júr. Meniń oıymsha Qazaqstan múmkindikter mekeni. Egerde óziń talpynsań, memleket árbir talpynysyńdy baǵalaıdy. Meniń oıymsha, ejelden bir-birine etene jaqyn qazaq pen qyrǵyz dostyǵy jyl sanap artyp keledi. Sondyqtan birligimiz jarasqan jerde maǵynaly ǵumyr keshýdi Alla násip etkendeı. Osy oraıda, otbasymdy aıaǵynan nyq turǵyzyp, ákemdi atpal azamatqa, anamdy isker áıelge aınaldyrǵan Qazaqstanǵa aıtar alǵysym zor. Buıyǵy kúıde bótensip kelgen qaımanany, qapsyra qushaǵyńa alǵanyń úshin qaıyrymdylyǵy men keńpeıildigi, danalyǵy men qonaqjaılyǵyń úshin qazaq halqyna taǵy da bir márte alǵys aıtamyn. Men áýletimniń áleýetin arttyryp, ósip-óngen eldiń shekarasyn jaýdan qorǵap, tynyshtyǵyn kúzetýge daıynmyn.
Ildar Gaınetdınov - 6699 áskerı bóliminiń qatardaǵy jaýyngeri
Men bashqurt ulty bolsam da, Qazaqstanda ózimdi sýda júzgen balyqtaı sezinemin. О́ıtkeni, men turmaq, meniń ákem de kindik qanyn Ekibastuz qalasynda tamyzǵan. Keshegi tarıhqa úńilsek, te qazaq elimen baýyrlastyq qarym-qatynas ǵasyrlar boıy jalǵasyn taýyp keledi. Mysaly Ýfadaǵy Ǵalııa medresesi talaı qazaq jastarynyń saýatyn ashqany ámbege aıan. Bul qala Alashordaǵa bas qosar qutty oryn boldy. Álıhan Bókeıhanov Orynbordy ortaq astana qylyp, bashqurt-qazaq birtutas avtonomııasyn qurmaqshy bolǵanyn da bireý bilse bireý bilmes. Jalpy, túrkitildes halyq bolǵan soń da tilegimiz bir. Sondyqtan tilektes eldiń týyn tik ustaý men úshin úlken abyroı. Búginde Ulttyq ulannyń «Shyǵys» óńirlik qolbasshylǵyna qarasty 6699 áskerı bóliminde el aldyndaǵy azamattyq boryshymdy ótkerýdemin. Bizdiń jaýyngerlik mindettiń basym bóligi О́skemen qalasyndaǵy túzeý mekemelerin kúzetýge negizdeledi. Qarýlastar arasynda daralanyp, kez kelgen áskerı synaqtan súrinbeı, qoıylǵan tapsyrmalardy der kezinde oryndaýǵa árdaıym barymdy salamyn. О́ıtkeni, men osylaısha, týǵan elge degen óz alǵysymdy bildirgim keledi.
Serjant
Rústem Muhamet-Raqym
О́skemen qalasy
