Qujattarǵa onlaın qol qoıady

Ǵylym jáne bilim mınıstrligi «Bolashaq» stı­pendııasynyń shart­taryna onlaın qol qoıý múmkindigi iske qosylǵanyn habarlady. Buǵan deıin kelisimsharttar jasaý úderisi 90 kúnge deıin sozylatyn, óıtkeni stıpendıattar men stıpendıattardyń kepilgerleri Astana qalasyndaǵy «Halyqaralyq baǵdarlamalar or­ta­lyǵy» AQ keńsesine ózi kelýge min­detti bolatyn. Endigi jerde sharttarǵa qol qoıý stıpendıat­tar men kepilgerlerdiń elektrondyq sıfrlyq qoltańbasyn paıdalana otyryp, TrustContract servısi arqyly júzege asyrylady. Árbir qol qoıýshyǵa SMS habarlama arqyly sharttyń mártebesi týraly habarlama jiberiledi.

Ǵylym jáne joǵary bilim mı­nıstri S.Nurbek osy máselege qatys­ty: «Usynylatyn qyzmetterdiń sapasyn arttyrý maqsatynda «Ha­lyqaralyq baǵdarlamalar ortalyǵy» bıznes-úderisterdi ońtaılandyryp, bıýrokratııalyq prosedýralardy azaıtyp, sıfrlyq formatqa kó­ship jatyr. Jumys toby ǵylymı taǵy­lym­damadan ótýshilerdiń kelisim­shartqa otyrý úderisin jedel sıfr­lan­dyrý mindetin qoıǵan bolatyn. «500 ǵalym» baǵdarlamasynyń jeńim­pazy bolyp tórtinshi lekte 481 ǵa­lym atandy jáne olardyń barlyǵy bir­ne­she kepilgerlermen birge kelisimshart­tar jasasý úshin óz aımaqtarynan Asta­na­ǵa kelip, jol júrýine, turýyna jáne kezekke turýyna jeke qarajatyn jumsaýshy edi. Endi búkil úderis bir-eki kúnge sozylyp, yńǵaılylyq pen shyǵyndy únemdeýge múmkindik beredi», dep jaýap berdi.

Mınıstrliktiń habarlaýynsha, ta­ǵylymdama baǵyty boıynsha «Bola­shaq» stıpendııasynyń ıegerleri úshin de onlaın kelisimshart­tar jasaý úderisi  qoljetimdi. Jaqynda magıstra­týra jáne doktorantýra ba­ǵyt­tary boıynsha «Bola­shaq» stıpendıattary úshin de kelisimsharttarǵa sıfrlyq qol qoıý qoljetimdi bolady. Qazirgi ýaqytta kepil múlkin sıfrlyq tirkeý úderisi Sıfrlyq damý, ınnova­sııa­lar jáne aeroǵarysh ónerkásibi mınıstrligimen pysyqtalyp jatyr.