Foto: assembly.kz
Astanada Qazaqstandaǵy alǵashqy kópultty «BIRLIK» án-bı ansambliniń tusaýkeseri ótedi. Roza Baǵlanova atyndaǵy «Qazaqkonsert» janynan qurylǵan shyǵarmashylyq ujym jandy aspaptyq súıemeldeý arqyly kásibı deńgeıde álem halyqtarynyń bılerin oryndaıdy. Onyń maqsaty óskeleń urpaqty túrli ulttyń óneri men mádenıetin tanystyrýǵa, ulttyq mádenı kodty jáne Qazaqstannyń kópulttylyǵy men birligin nyǵaıtýǵa baǵyttalǵan.
Almatyda Memlekettik akademııalyq bı teatry, Qudys Qojamııarov atyndaǵy respýblıkalyq memlekettik akademııalyq uıǵyr mýzykalyq komedııa teatry, «Saltanat» memlekettik bı ansambli jáne «Qazaqstan kameraty» klassıkalyq mýzyka ansambli qaıyrymdylyq konsertterin ótkizedi.
Shymkentte «Alǵys kerýeni», «Alǵys keshi» is-sharalary uıymdastyrylady. Sondaı-aq qala kitaphanalarynda taqyryptyq kórmeler men oqý saǵattary josparlanǵan.
Al Jetisý oblysynda «Alǵysym sheksiz» aksııasy bastaldy. Is-shara aıasynda barsha turǵyndar men qonaqtarǵa merekeniń sımvoly sanalatyn qurt taratylady.
Jambyl oblysynda «Jambyl – meniń jáı atym, Halyq – meniń shyn atym» respýblıkalyq aqyndar aıtysy, Shyǵys Qazaqstan oblysynda «Aq bosaǵa», «Altaı» bı jáne folklorlyq-etnografııalyq ansamblderiniń qatysýymen «Bárińe alǵys – blagodarnost vsem» merekelik konserti ótedi.
Abaı oblysynda da qaıyrymdylyq aksııalary, taqyryptyq kórmeler, kezdesýler men merekelik konsertter ótedi.
Mańǵystaý oblysyndaǵy «Beıneý» aýdandyq mádenıet úıiniń qyzmetkerleri Alǵys aıtý kúnine oraı «Tegin taksı» qyzmeti usynylady.
Qazaqstanda Alǵys aıtý kúni 2016 jyldan beri atalyp ótedi. Ulttar arasyndaǵy ózara tatýlyq pen myzǵymas birliktiń berik dástúrlerin nasıhattaý arqyly bul kúnniń mańyzy artyp keledi.
