«Qazaqstan – Sırıýs» jobasy memleketter basshylarynyń ýaǵdalastyǵyna saı iske asyrylyp jatyr. «Sırıýs» modeli boıynsha elimizdiń eki qalasynda bilim berý oshaǵy qurylady. Astanamen qatar bıyl qańtar aıynda Almaty qalasynda da mektep pen ortalyqtyń irgetasy qalandy.
Jobanyń maqsaty – daryndy balalardy qamqorlyqqa alyp, ǵylym, tehnologııa jáne ınnovasııa salalaryn tereń meńgergen, básekege qabiletti mamandardyń jańa býynyn tárbıelep shyǵarý.
Osy oraıda «О́rleý» BAUO AQ Basqarma Tóraǵasy Almatov Ǵalymjan Baýyrjanulynyń pikirin bilgen edik.
«Sırıýs – Qazaqstan» jobasy bilim berý úderisine ulttyq mazmundy mindetti túrde engizýdi kózdeıdi. Oqý baǵdarlamalaryna «Dombyra», «Ulttyq óner», «Ulttyq sport» kýrstary, sondaı-aq «Adal azamat» birtutas tárbıe baǵdarlamasy engiziledi. Bul zamanaýı bilimdi ulttyq qundylyqtarmen jáne mádenı biregeılikpen ushtastyrýǵa múmkindik beredi», dedi Ǵalymjan Almatov.
Ǵ. Almatovtyń aıtýynsha, Memleket basshysy Qasym-Jomart Toqaevtyń tapsyrmasy aıasynda júzege asyrylyp jatqan «Sırıýs – Qazaqstan» jobasy bilim sapasyn arttyrýǵa jáne oqýshylardyń halyqaralyq deńgeıdegi básekege qabilettiligin kúsheıtýge baǵyttalǵan. Bul joba bilim berý salasyndaǵy adamı kapıtaldy damytý jónindegi memlekettik saıasattyń mańyzdy bóligi sanalady.
«Ortalyqtyń ashylýy daryndy balalardy erte anyqtaý jáne olardy júıeli qoldaý tetikterin kúsheıtýge múmkindik beredi. Joba aıasynda ǵylym, tehnologııa jáne jobalyq qyzmetke baǵyttalǵan tereńdetilgen baǵdarlamalar engizilip, talantty oqýshylardy qoldaýdyń turaqty ekojúıesi qalyptasady. Sonymen qatar STEM, IT, ınjenerııa jáne zertteý baǵyttaryna basymdyq berý arqyly eldegi zamanaýı bilim berý ınfraqurylymyn damytýǵa serpin beredi», dedi Ǵalymjan Baýyrjanuly.
Onyń aıtýynsha, bul ortalyqtyń basty artyqshylyǵy − zamanaýı bilim berý tásilderin ulttyq qundylyqtarmen ushtastyrýynda.
«Atalǵan ortalyq oqýshylardyń tek akademııalyq bilimin ǵana emes, ulttyq bolmysyn, mádenı tanymyn jáne rýhanı qundylyqtaryn da damytýǵa múmkindik beredi. Sonymen qatar ortalyqta matematıka, ınjenerııa, jasandy ıntellekt, robototehnıka jáne zertteý baǵyttaryna erekshe basymdyq beriledi. Iаǵnı oqýshylar teorııalyq bilimmen qatar praktıkalyq jáne jobalyq daǵdylardy meńgeredi. Sonyń arqasynda joba halyqaralyq deńgeıdegi zamanaýı bilim berý tásilderin qazaq halqynyń mádenı murasymen úılestiretin biregeı model qalyptastyrýy múmkin. Bul óz kezeginde ulttyq bilim berý júıesiniń jańa sapalyq deńgeıge kóterilýine yqpal etedi», dedi Ǵ. Baýyrjanuly.
Ǵalymjan Almatovtyń pikirinshe, joba otandyq pedagogterdiń kásibı damýyna da oń yqpal etedi. «Sırıýs – Qazaqstan» jobasynda pedagogıkalyq quram negizinen otandyq mamandardan jasaqtalady. Olardyń úlesi shamamen 80 paıyzdy quraıdy.
Gúljaına Eleýsinova: «Sırıýs – Qazaqstan» jobasy – sapaly bilim men ulttyq qundylyq úndestigi
«Sonymen qatar halyqaralyq tájirıbe men «Talant jáne tabys» qorynyń biliktilikti arttyrý baǵdarlamalaryn qoldaný kózdeledi. Bul Qazaqstan pedagogteriniń tájirıbesin álemdegi ozyq ádistermen ushtastyrýǵa, zamanaýı bilim berý tehnologııalaryn meńgerýge jáne kásibı quzyretterin arttyrýǵa múmkindik beredi», dedi ol.
Onyń aıtýynsha, «Sırıýs – Qazaqstan» jobasy ǵylym, tehnologııa jáne ınnovasııa salasyndaǵy jańa býyn mamandaryn daıarlaýǵa baǵyttalady.
«Ásirese IT, ınjenerııa, jasandy ıntellekt, robototehnıka jáne zertteý baǵyttaryndaǵy mamandarǵa basymdyq berilýi múmkin. Sonymen qatar joba oqýshylardyń analıtıkalyq oılaýyn, jobalyq jáne zertteýshilik daǵdylaryn damytýǵa múmkindik beredi. Bul bolashaqta ǵylymı-zertteý, joǵary tehnologııa, sıfrlyq ekonomıka jáne ınjenerlik ındýstrııa salalarynda básekege qabiletti mamandardyń qalyptasýyna yqpal etedi. Uzaq merzimdi perspektıvada joba eldiń zııatkerlik áleýetin nyǵaıtyp, bilim ekonomıkasyn damytýǵa negiz bolady. Sondaı-aq ǵylymı-tehnologııalyq baǵyttar boıynsha erte kásibı baǵdar berý arqyly talantty jastardyń áleýetin ashýǵa jáne halyqaralyq deńgeıde suranysqa ıe kadrlar daıarlaýǵa múmkindik beredi. Qazaqstan úshin bilim men adamı kapıtal negizgi strategııalyq resýrsqa aınalady», dep túıindedi Ǵalymjan Almatov.
Qanybek Jumashev: «Sırıýs – Qazaqstan» jobasy ulttyq mazmunda engiziledi
Eske salaıyq, búgin Qazaqstan Prezıdenti Qasym-Jomart Toqaev pen Reseı Prezıdenti Vladımır Pýtın onlaın-formatta «Qazaqstan – Sırıýs» halyqaralyq bilim berý ınfraqurylymynyń kapsýlasyn salý rásimine qatysty. Keleshek keshenniń irgetasyna rámizdik kapsýlany elordalyq oqýshylar Oqý-aǵartý mınıstri Juldyz Súleımenovamen, «Sırıýs» federaldyq aýmaq keńesiniń tóraǵasy, «Talant ı ýspeh» qorynyń jetekshisi Elena Shmelıovamen birge saldy.
