Foto: Áset Qundaqbaev
Aıta ketsek qalalyq jáne aýdandyq shaqyrý komıssııalarynyń jumysy jergilikti atqarýshy organdar ákimderi orynbasarlarynyń basshylyǵymen júrgiziledi.
«2024 jyldyń 30 maýsymyna deıin Qarýly Kúshterdiń, basqa da áskerler men áskerı quralymdardyń qataryn 18 ben 27 jas aralyǵyndaǵy 20 myńǵa tarta azamat tolyqtyrady. Qarýly kúshterge 10 000-ǵa jýyq, Ulttyq ulanǵa – 6 500-den astam, UQK Shekara qyzmetine – 3 000-daı, Tótenshe jaǵdaılar mınıstrligine jáne Memlekettik kúzet qyzmetine – 500-den asa azamatty shaqyrý josparlanyp otyr», dedi polkovnık A. Dosymov.
Áskerge shaqyrylatyndardy habardar etý jeke shaqyrý qaǵazdaryn úılerine nemese qyzmettik mekenjaılaryna jiberý arqyly júzege asyrylady.
Polkovnık Farhat Aıdarbaev merzimdi áskerı qyzmetti dáripteý barysynda memleket qabyldaǵan sharalarǵa toqtaldy.
Merzimdi áskerı qyzmettiń tartymdylyǵyn arttyrýǵa baǵyttalǵan Memleket basshysynyń tapsyrmasyn oryndaý maqsatynda sarbazdarǵa «kredıttik demalys» berý jobasy sátti júzege asyrylyp jatyr. Máselen, búgingi tańda 2,3 mlrd teńge somasyna 6 myńnan astam áskerı qyzmetshiniń tólemderdi keıinge qaldyryldy.
«Prezıdenttiń armııada jumysshy mamandyǵyn úıretý týraly tapsyrmasy iske asyrylyp jatyr. Qarýly Kúshterdiń, basqa da áskerler men áskerı quralymdardyń oqý ortalyqtarynda áskerı-eseptik mamandyqtar boıynsha daıarlyq júrgiziledi. Oqý aıaqtalǵannan keıin ár áskerı qyzmetshi memlekettik úlgidegi kýálik alady. Áskerden keıin osyndaı mamandyq meńgergenderdiń jumysqa ornalasý múmkindigi kóbirek. Buǵan qosa kelisimshart boıynsha áskerı qyzmetke kirý múmkindigi de qarastyrylǵan», dep túsindirdi Departament bastyǵynyń orynbasary polkovnık F.Aıdarbaev.
