60-qa jýyq etnosty bir sahnada toǵystyrǵan aıtýly keshte 200-deı adam óner kórsetti. Munda orkestrler, bı ansamblderi jáne aspaptyq ansamblder bas qosqan. Ujymnyń quramyna elimizde turatyn etnos ókilderiniń arasynan úzdik 20 bıshi men mýzykant arnaıy kastıng arqyly tańdalypty. Olardyń erekshe ári eksklıýzıvti bı kompozısııalaryn qoıýǵa Reseı, Tatarstan, О́zbekstannan shaqyrylǵan kórnekti sheteldik mamandar jáne Qazaqstannyń eńbek sińirgen qaıratkerleri atsalysqan. Qatarynda О́zbekstannyń eńbek sińirgen qaıratkerleri Evelına Protasova, Odılbek Orıpov, Reseıdiń eńbek sińirgen ártisi, Reseıdiń eńbek sińirgen óner qaıratkeri, Omby memlekettik orys halyq horynyń bas baletmeısteri Zýfar Tolbeev, Tatarstannyń halyq ártisi, Tatarstannyń Memlekettik án-bı ansambliniń pedagog-horeografy Lıaısan Hametova bar. Daıyndyqty horeograftar Anel Marabaeva, Aıda Bekıshova, baletmeıster Jańataı Qojabekov pen tusaýkeser-konserttiń rejısseri Saıan Myrza júrgizgen.
– Iriktedik, arasynda qabileti baryn aldyq. Bul ansambldiń quramyndaǵy bıshiler Qazaqstannyń ár óńirinen keldi. Sonyń ishinde grýzın, orys, qazaq, tatar, ult ókilderinen quralǵan ónerpazdar bar. Daıyndyǵymyz bir aı boldy. Bul – óte az ýaqyt. Soǵan qaramaı, osy konsertti ótkizýge tyrystyq. Ansambldiń maqsaty – elimizde turatyn túrli etnos ókilderiniń tatý-tátti, birlikte ómir súrip jatqandyǵyn kórsetý. О́nerde bas biriktirý. Shetelderden shaqyrylǵan baletmeısterlar óte joǵary deńgeıde bı qoıylymdaryn qoıa bildi, – dedi horeograf Jańataı Qojabekov.
Beıbitshilik jáne kelisim saraıyna tusaýkeser konsertti kórýge jınalǵan halyqtyń qarasy qalyń boldy. О́nerpazdarmen birge olar da el aýzyndaǵy esti ánderdi shyrqap, bı bıledi. Osylaısha, Ansambl músheleriniń ǵana emes, turǵyndardyń da birligi bekem ekenin kórsetti. Jobanyń rejısseri, uıymdastyrýshysy Qarlyǵash Ájıeva qysqa ǵana ýaqytta óte qajet jáne tamasha jastar ujymyn qurdyq dep otyr.
– «Birlik» ansambliniń ereksheligi elimizde turatyn etnos ókilderiniń ártisterinen jasaqtalyp otyr. Otanymyzdaǵy ár halyqtyń óneri men mádenıetin, folkloryn, tipti umytýǵa aınalyp bara jatqan qundylyqtaryn kórsetýdi kózdedik. Ujymnyń biregeı repertýary elimizdegi 130 etnostyń mýzykalyq murasy men ónerin qamtıdy. Olardyń árqaısysynyń áni men bıinen bólek aspaptary – óz aldyna bir tóbe. Oǵan qosa elimizdegi etnostardan quralǵan ansambl arqyly rýhanı tutastyqty áıgilegimiz keledi, – dedi Qarlyǵash Ájıeva.
Jandy aspaptyq súıemeldeýmen álem halyqtarynyń bılerin kásibı deńgeıde oryndaýshylardy tamashalaýǵa Mádenıet jáne aqparat mınıstri Aıda Balaeva, Senat jáne Májilis depýtattary, dıplomatııalyq korpýs, Qazaqstan halqy Assambleıasy men etnomádenı birlestikterdiń ókilderi qatysty. Sondaı-aq dýmandy keshke shetel elshileri de kelip, áserlerimen bólisti.
– О́zge elderdiń mádenıetine degen sheksiz qurmetti kórip, qazaq halqynyń tektiligine taǵy bir márte qaıran qalyp turmyn. О́nerde shekara joq. Ol dostyqty bekite túsetin altyn kópir ispetti. Onyń naq dálelin «Birlik» ansambli pash etti. О́nerpazdarǵa men qatty tánti boldym, – dedi EO ókildiginiń Qazaqstandaǵy tóraǵasy Kıastýtıs Iаnkaýskas.
Keshtegi qurmetti qonaqtyń biri – Belarýs elshisi Pavel Ýtıýpın. Ansambl quramynda shetel saıasatkeriniń qyzy da óner kórsetti. Olar ultynyń mádenı kodyn saqtaýǵa atsalysyp, qoǵamǵa qyzmet etýge múmkindik bergeni úshin halqymyzǵa alǵysyn jaýdyrdy.
– Barsha qazaqstandyqtardy Alǵys aıtý kúnimen quttyqtaımyn. Bul – 120-dan astam etnosty biriktiretin mereke. Sońǵy halyq sanaǵy boıynsha belarýstar Qazaqstandaǵy ulttar arasynda on birinshi orynda turǵanyn kórdim. Táýelsiz Qazaqstanda turyp, eldi damytýǵa úles qosyp jatqan etnostardyń ishinde belarýstar da bar ekenin maqtan etemin. Sondyqtan belarýstar órkendegen táýelsiz Qazaqstannyń damýyna óz úlesterin qosyp jatqanyna qýanamyz. Sondyqtan qazaqstandyqtarǵa beıbitshilik, jaqsylyq tileımin. Kesh joǵary deńgeıde ótti. Bul eldiń tynys-tirshiligin anyq kórsete bildi. Qyzym da óner kórsetip, mańyzdy is-sharada Belarýs mádenıetimen bólisti, – dedi Belarýstiń Qazaqstandaǵy tótenshe jáne ókiletti elshisi Pavel Ýtıýpın.
Al Kanadanyń Qazaqstandaǵy tótenshe jáne ókiletti elshisi Alan Hemson Alǵys aıtý kúnine arnalǵan konsertke alǵash ret qatysqanyn jasyrmady.
– Konsert óte qyzyqty ótti. Túrli etnos ónerpazdarynyń ónerlerin kórdik. Meniń ata-anam mýzykanttar. Sodan bolar, ózge halyqtardyń shyǵarmashylyǵymen tanysqan unaıdy. Kanadada Alǵys aıtý kúni bar. Ortaǵa, qaıyrymdy jandarǵa, jalpy búkil jaqsylyqtyń bastaýyna alǵys aıtamyz. Qazaqstanda mýltımádenıetti kórsete alatyn kúnniń bary qandaı keremet, – dedi Alan Hemson.
Konsert kóptiń qurmetimen «Jolymyz bir» ánimen qorytyndylandy. Osylaısha, «Birlik» ansambli bir týdyń astyna birikken jolymyzdyń eshqashan aıyrylmaıtynyn meńzedi.
