Prezıdent Ákimshiligi, Qazaqstan halqy Assambleıasy hatshylyǵy jáne Mádenıet jáne aqparat mınıstrligi uıymdastyrǵan respýblıkalyq is-sharada qıly zaman, kúrdeli kezeńde elimizge qonys tepken túrli etnos ókiliniń urpaǵy telekópir formatynda qonaqjaı qazaq halqyna, jerine alǵysyn jetkizdi. Jıylǵandar ıyq tirese birge eńsergen ýaqytty eske aldy. Is-sharaǵa Qazaqstan halqy Assambleıasy tóraǵasynyń orynbasary – Prezıdent Ákimshiligi Qazaqstan halqy Assambleıasy hatshylyǵy meńgerýshisi Marat Ázilhanov, Mádenıet jáne aqparat vıse-mınıstri Danııar Qadyrov, Parlament depýtattary, QHA jastary jáne etno-mádenı birlestik ókilderi qatysty. Assambleıa úzdikterine «Alǵys» tósbelgisi tabystaldy.
– Maqsat – ártúrli salalarda jáne kásipterde adal qyzmet etip, azamattyq erlik jasap, eldiń damýyna úlesin qosyp júrgen, sondaı-aq túrli oqıǵalar men jaǵdaılar kezinde belsendilik pen azamattyq ustanymyn tanytqan qazaqstandyqtarǵa alǵys aıtý. Assambleıa óńirlerde, Astanada 250-den astam túrli formatta is-shara ótkizip jatyr. Mundaǵy basty maqsat – adam men adamdy, ulys pen ulysty, ult pen ultty jaqyndastyrý, baýyrlyq sezimdi oıatý, júregińdegi ár adamǵa degen mahabbatyńdy, jyly sezimińdi bildirý, sol arqyly alysty jaqyndaý, jaqyndy týystyrý, – dedi Marat Ázilhanov.
Merekelik is-sharada Astanadaǵy kópbalaly eki otbasy kútpegen jerden qýanyshqa keneldi. Qos shańyraqqa sol jaǵalaýda ornalasqan sý jańa páter kilti tabystaldy. Jańa qonysqa ıe bolǵandardyń biri – Berdııarovtar otbasy. Otasqanyna 18 jyl tolǵan shańyraq segiz bala tárbıelep otyr. Eki kún buryn kenjesi dúnıege kelgen.
– Jataqhananyń aıadaı bólmesin 8 jyl jaldap turdyq. 18 sharshy metrde 5 jyl turyppyz. Keıin otbasym úlkeıgen soń, ekinshi bólmesin aldyq. Birer kún buryn segizinshi perzentim dúnıe esigin ashty. Esimin atasy Shahnazar dep qoıdy. Bul úlken rızyq sol Shahnazarymnyń nesibesimen kelip tur eken. Alla razy bolsyn, – deıdi qala turǵyny Dáýlet Berdııarov.
Qaıyrymdylyqtyń shapaǵatyn jalǵyzbasty ana Meıramgúl Shyńǵysbaeva da kórdi. Oǵan da merekede 1 bólmeli baspana buıyrdy. Kópbalaly otbasyna baspana syılap qýantqan kásipker – Qazaqstan halqy Assambleıasynyń múshesi ári Assambleıa tóraǵasynyń orynbasary Akbarjan Ismaılov. «Qazaq halqyna degen alǵys sózben ǵana emes, ispen de kórsetilýge tıis», deıdi ol.
Assambleıanyń «Qaıyrymdylyq kerýeni» áleýmettik jobasy bıyl osyndaı ıgi istermen bastaldy. Aksııa aıasynda 9 jyl boıy barlyq aımaqta ıgi is-sharalar uıymdastyrylyp keledi. Ashyp aıtsaq, uıym músheleri qarttar men balalar úılerinde konserttik baǵdarlamalar uıymdastyryp, kópbalaly jáne muqtaj otbasylarǵa azyq-túlik sebetterin taratady. Byltyrdyń ózinde uıymnyń uıytqy bolýymen el boıynsha bas-aıaǵy 1 mlrd 700 mln teńgege túrli qaıyrymdy is jasalypty. Oǵan qosa merekelik otyrysta etnosaralyq birlikti nyǵaıtý maqsatynda «Shańyraq» shyǵarmashylyq baıqaýy iske qosylǵanyn jarııalady.
