Shýaqty merekeniń qurmetine oraı Prezıdent Jarlyǵymen aımaǵymyzdaǵy 8 kópbalaly ana «Altyn alqa», 39 ana «Kúmis alqa» ıegeri atanyp otyr. Bul basqosýda aımaq basshysynyń qolynan «Altyn alqany» alý baqyty Zakıra Muqymbekqyzy men Ǵalııa Qashaýbaevaǵa buıyrdy. Al «Kúmis alqamen» Svetlana Jumadilova men Venera Kentaeva marapattaldy.
Aımaq basshysy Prezıdent joldaǵan quttyqtaýhatty fılologııa ǵylymdarynyń doktory, professor, qoǵam qaıratkeri Nursulý Býketovaǵa tabystady. E.Bóketov atyndaǵy Qaraǵandy ýnıversıtetiniń saıasattaný jáne áleýmettaný kafedrasynyń aǵa oqytýshysy, áleýmettaný magıstri, áıelder isteri jáne otbasylyq-demografııalyq saıasat jónindegi oblystyq komıssııanyń múshesi Tatıana Rezvýshkınany Ulttyq komıssııanyń Alǵyshatymen marapattady.
– Analardyń merekesi – ómirdegi eń izgi merekeniń biri. Sebebi ana – árbir adam úshin eń aıaýly, eń ardaqty jan. Dúnıede anadan qymbat, anadan asyl jan joq. Bar jylýyn bala tárbıesine arnaıtyn da, otbasylyq dástúrdi saqtaıtyn da aıaýly analarymyz ben asyl ájelerimiz. Sondyqtan analar merekesi – bizdiń barlyǵymyz úlken qýanyshpen qarsy alatyn jaqsy bir merekemiz. Bolashaǵyn oılaǵan el, eń aldymen, áıelderge qurmet kórsetedi. Bul – ómirdiń buljymas zańy, – dedi óziniń quttyqtaý sózinde E.Qabdýlauly.
Memlekettik marapattardy tabystaǵan soń ákim jıynǵa qatysýshy jandarmen ashyq áńgimelesti. Prezıdenttiń quttyqtaýyn alǵan professor Nursulý Býketova alǵys bildirip, áıelderdiń qoǵamdaǵy orny men bedeli jóninde sóz qozǵaı ótti.
Balqash qalasy Analar keńesiniń tóraǵasy Almıra Mýsına bala tárbıesi týraly aıtsa, bes balanyń anasy, onyń ishinde úsh qyzy sport sheberligine úmitker Marııa Ospanova otbasy qundylyǵy jóninde áńgimeledi.
«Batyl Jurek» qoǵamdyq qorynyń Saran qalasyndaǵy fılıalynyń basshysy Bıbigúl Stesko qordyń atqaryp jatqan jumystaryna toqtaldy.
Qazaqstannyń júzý sporty boıynsha eńbek sińirgen jattyqtyrýshy Evgenııa Vladımırovna qazirgi ýaqytta parasportshylardy daıyndap jatyr. Byltyr Azııa oıynynan júldeli oryn alǵan Roman Potapovty jattyqtyrǵan. Júzý sportyna kórsetilip júrgen memleket qamqorlyǵyna rızashylyǵyn jetkizdi.
Qarqaralydaǵy «Arman» sharýa qojalyǵynyń basshysy, kásipker Natalıa Aleksandrovna da jıynda sóz aldy. Memlekettik tilde erkin kósilgen bes balanyń anasy aýyl tirshiligindegi ananyń atqarar rólin sóz etti.
Elý jylǵa jýyq Osakarov aýdandyq aýrýhanasynda dermato-venerologııalyq kabınetiniń medbıkesi bolyp qyzmet etken Raısa Ilvanıdı aýyl medısınasyna aıryqsha nazar aýdarylǵanyn aıtyp, alǵysyn bildirdi. Qaraǵandy ýnıversıteti morfologııa kafedrasynyń professory Maıda Túsipbekova da medısına tóńireginde sóz qozǵady.
«Tazalyq Ekspert» JShS qyzmetkeri Dıdar Ábdikárimova da merekelik kezdesýge shaqyrtý alǵanyna alǵysyn bildirip, «kóshe tazalyǵymen qoǵam bolyp kúresýimiz qajet», dedi.
Shet aýdany Joǵarǵy Qaıraqtyǵa qarasty Maıbas qystaǵynda joldasyna qolǵabys etip, traktor aıdap, shóp shabatyn Araılym Baıdashova sharýashylyqtarynyń aldaǵy josparlaryn aıtyp berdi.
Merekelik kezdesý sońynda Osakarov aýdandyq mádenı-demalys ortalyǵynyń mýzykalyq jetekshisi Anargúl Naýryzhan «Abzal ana» ánin shyrqady. Jany jadyraǵan meımandar Kenshiler saraıynda ótetin merekelik konsertke jol tartty.
