Mektepterdi jańa formasııadaǵy pedagogıkalyq kadrlarmen qamtamasyz etý maqsatynda Ǵylym jáne joǵary bilim mınıstrligi men Astana qalasy bilim basqarmasynyń qoldaýymen Abaı ýnıversıtetiniń 181 stýdenti bas qalamyzdyń 32 bilim berý uıymyna óndiristik tájirıbege kelgen. Sol stýdenttermen Eýrazııa ulttyq ýnıversıtetinde kezdesý ótti. Oǵan mınıstr Saıasat Nurbek jáne L.N.Gýmılev atyndaǵy Eýrazııa ulttyq ýnıversıteti men Abaı atyndaǵy Qazaq ulttyq pedagogıkalyq ýnıversıtetiniń rektorlary, Astana qalasy bilim basqarmasynyń jaýapty mamandary, oqý oryndarynyń basshylary qatysty.
Mazmundy shara barysynda S.Nurbek 2023-2029 jyldarǵa arnalǵan joǵary bilim men ǵylymdy damytý tujyrymdamasyna, kadrlarmen qamtamasyz etýge jáne pedagogıkalyq bilim berý máselelerine keńirek toqtaldy. Tájirıbeden ótýge kelgen talapty jastarǵa qoldaý kórsetip, baǵyt siltedi. Sondaı-aq jastardyń ózderine artylǵan jaýapty isti laıyqty alyp shyǵatynyna senim bildirdi.
– Búginde Astanada pedagog kadrlardyń tapshylyǵy baıqalady. Jyl saıyn elordada ondaǵan mektep paıdalanýǵa beriledi. Bul muǵalimderge degen qajettiliktiń artyp kele jatqanyn kórsetedi. Stýdentterdiń búgingi qadamy osy máseleni sheshýge kómektesedi dep senemin. Jalpy jańa deńgeıdegi pedagog kadrlardy daıarlaýdy únemi nazarda ustaımyz, – dedi mınıstr.
Kezdesýge qatysqan stýdent-praktıkanttardyń da júzderi bal-bul janyp, rızalyq keıipte bolǵanyn baıqadyq. Abaı atyndaǵy Qazaq ulttyq pedagogıkalyq ýnıversıtetiniń stýdenti Imanǵalı Mámbetáli bul ózderi úshin jańa orta ǵana emes, qolaıly múmkindik ekenin aıtty.
– Biz – Abaı ýnıversıtetiniń tórtinshi kýrsynda oqımyz. Osyndaı múmkindik týǵyzǵan Ǵylym jáne joǵary bilim mınıstrligi men Astana qalasy bilim basqarmasyna rızashylyǵymyzdy bildiremiz. Bir jaǵynan, bul – úlken jaýapkershilik. Biz osyndaı tájirıbeniń uıymdastyrylǵanyna qýanamyz. Oqý ordalary bizdi jyly qabyldady. Memleketimiz stýdentterdiń sapaly bilim alýyna barlyq is-shara qabyldap jatyr. Sol senimdi aqtaýǵa kúsh salamyz, – dedi ol rıza kóńilmen.
Memleket basshysy Qasym-Jomart Toqaev byltyr qazan aıynda ótken Respýblıkalyq pedagogter sezinde elimizde 5 myń pedagog jetispeıtinin aıtqan bolatyn. Bul kórsetkish jyldan-jylǵa artyp keledi. Al pedagogıka salasynda oqyǵan árbir besinshi túlek óz mamandyǵymen jumys istemeıdi eken. Buǵan qosa muǵalimderdiń 23 paıyzynda ǵana joǵary biliktilik sanaty bar. Munyń bári pedagogterdi daıarlaý jáne olardyń biliktiligin arttyrý tásilderin túbegeıli ózgertýdi qajet etedi.
