Foto: senate.parlam.kz
Senator 2018 jyldan 2022 jylǵa deıin halyqaralyq derekter bazasynyń qyzmetin tóleýge memleket bıýdjetinen 5,2 mlrd teńge jumsalǵanyn atap ótti. Biraq Scopus derekter bazasy boıynsha Qazaqstan ǵalymdary maqalasynyń jahandyq aýqymdaǵy úlesi az deńgeıde qalyp keledi.
«Ǵylymı maqalalardy jarııalaýǵa baılanysty problemalyq negizgi máselege nazarlaryńyzdy aýdarǵym keledi. Ǵylymı jumystardy jarııalaýdaǵy qıyndyq kúshti básekelestik pen resenzııanyń qatań talabyna, sondaı-aq qarjy kedergisine baılanysty. Halyqaralyq bazalar barlyq ǵylymı salany birdeı qamtı almaıdy, bul keıbir mamandandyqtaǵy zertteýshilerdi qolaısyz jaǵdaıǵa dýshar etedi. Bizdiń ǵalymdardyń ósip-órkendeýi jalǵyz baǵalaýǵa baılanysty bolýy múmkin emes. Ol halyqaralyq bazada mamandyǵy tanymal emes nemese kópshilikti qyzyqtyrmaıtyn adamdarǵa ádiletsiz bolyp otyr. Bul akademııalyq ádilettilik máselesi», dedi Qaırat Tastekeev.
Qaırat Tastekeev osyǵan baılanysty halyqaralyq bazalardaǵy maqalasymen shektelmeı, dıssertasııalyq jumystardyń sapasyn baǵalaý ólshemsharttaryn qaıta qaraýdy usyndy. Depýtat halyqaralyq derekter bazasyna engizý úshin olardyń deńgeıin arttyrýǵa yqpal etetin sapaly ulttyq ǵylymı jýrnaldardy damytý men qoldaýdyń mańyzdylyǵyn atap ótti. Senator sonymen qatar jas ǵalymdardy óz jumystaryn halyqaralyq jýrnaldarda jarııalaýǵa qoldaý kórsetý úshin arnaıy granttardyń bolýyn mańyzdy dep sanaıdy.
«Halyqaralyq ǵylymı bazalarǵa qol jetkizý jáne akademııalyq jazý boıynsha trenıngterdi qamtamasyz etýmen qosa zertteýlerdiń sapasyn arttyrý jóninde keshendi baǵdarlamalar ázirleý kerek», dedi Senat depýtaty.
