Memleket basshysy «Egemen Qazaqstan» gazetine bergen suhbatynda: «Naýryz – jańarý men jańǵyrýdyń sımvoly. Sondyqtan tól merekemizdiń mazmunyn baıytyp, ony barynsha erekshelep, jańasha atap ótýimiz kerek. Bul qadam qoǵamdy uıystyryp, ulttyq biregeıligimizdi aıshyqtap, el birligin nyǵaıta túsýge yqpal etedi dep senemin» dep basa aıtqan edi. Osy oraıda joba bastamashysy «Alatau Aqparat» medıaholdınginiń bas dırektory Erjan Qalymbaıuly da ulys kúnin eń áýeli balalar kútetin merekege aınaldyrýdy maqsat etip otyrǵanyn aıtady.
Meıramnyń basty keıipkerleri retinde uıymdastyrýshylar Qydyr atanyń qasyna nemeresi Baq-balany qosýdy jón sanaǵan. Aıtýynsha, bul – qazaqtyń «baq qarasyn, Qydyr darysyn» degen batasynan alynyp otyrǵan oı. Rasynda, Qydyr atanyń nemeresimen júrýi – urpaq sabaqtastyǵy men ulttyq tárbıesin kórsetetin kórkem rámiz ispetti.
Uıymdastyrýshylar Naýryzdy merekeleýdi Almaty oblystyq №1 balalar úıinen bastady. Ár tárbıelenýshige kıiz úı pishininde tigilgen balalarǵa arnalǵan «Tartý» qorjyny tabystaldy. Qorjynda Qazaqstannyń ár óńirinen jetken ulttyq dámder salynǵan. Olardyń sany – jeteý. Sondaı-aq Altaıdyń baly, Almatynyń almasy sekildi elimizdiń brendteri men balalarǵa arnalǵan kitap ta qorjynǵa salynǵan.
Naýryzda jastar úlkenderge arnaıy sálem berip, qurmet kórsetip, batasyn alǵan. Ulttyq jobany uıymdastyrýshylar da Asanáli Áshimov, Asyly Osman, Tóregeldi Sharmanov syndy ult zııalylaryna, qoǵam qaıratkerlerine, sondaı-aq eńbek adamdaryna da sálem bere bardy. Olarǵa «sybaǵa» qorjyny tartý etilip, ıyqtaryna shapan jabyldy. Qorjynda jeti dámnen bólek, dástúrge saı ettiń súbeli bólikteri qazy-qarta, jal-jaıa men jambas salynǵan.
Uıymdastyrýshylar «Uly dala dámi» ulttyq jobasyn aldaǵy jyldary 14 naýryzdan bastap aıdyń sońyna deıin tutas respýblıka kóleminde ótkizýdi josparlap otyr.
