41433 áskerı bóliminiń sarbazdary Amal merekesin jyl saıyn atap ótedi. Jaýyngerler baýyrsaq pisirip, aqtan dám tatyp, tós qaǵystyryp bir arqa-jarqa bolady. Keıin áskerılerden quralǵan ártister Kórisý kúni, Mádenıet jáne ulttyq salt-dástúr kúni jáne Ulttyq kıim kúni dep merekeniń kórigin qyzdyra túsedi.
– 14 naýryz ejelden qazaqtar arasynda jańa jyldyń basy bolyp sanaldy. Buryn Kórisý kúni tek batysta ǵana toılanatyn, al qazir ol barsha elimizge tanymal bolyp keledi. Bul – qýanarlyq jaıt. Biz óz dástúrlerimiz ben ádet-ǵuryptarymyzdy saqtap, urpaqqa osyny úıretýimiz kerek. Jan-jaqtan shaqyrylǵan sarbazdar Amaldyń tarıhyn qyzyǵýshylyqpen tyńdady. Kópshiligi muny alǵash toılap otyrǵanyn aıtty. Naýryz – tek turǵyndardy emes, áskerı qyzmetshilerdi de jaqyndastyrady. О́ıtkeni áskerı ujymdaǵy mádenı-rýhanı is-sharalar dostyq baılanysty odan ári nyǵaıta túsedi, – dedi 41433 áskerı bólim komandıriniń orynbasary, podpolkovnık Meıram Qappasov.
Sondaı-aq Ulystyń uly kúni aıasynda áskerıler «Jan Erkemaı-Atyraý» qoǵamdyq qorynyń erekshe qajettilikteri bar balalarǵa arnalǵan ortalyǵyna bardy. Balalarǵa merekelik kóńil kúı syılap, táttiler men syılyqtar úlestirdi. Qoǵamdyq qordyń basshysy Álııa Qubaeva: «Sizder bizdiń, Otanymyzdyń qorǵaýshylarysyzdar. Kesteniń tyǵyzdyǵyna qaramastan, bizdi qoldaýǵa ýaqyt tapqandaryńyzǵa, jas tárbıelenýshilerimizben jaqsylyq, jylýlyqpen bóliskenderińizge, olarǵa jaǵymdy emosııalar syılaǵandaryńyzǵa myń alǵys», dep ıgi tilegin jetkizdi.
О́z kezeginde áskerı qyzmetshilerdiń otbasy múshelerimen jumysty uıymdastyrý qyzmetiniń basshysy Darıa Shókenova Atyraý garnızonynyń jeke quramy balalar men qarttar úıine, ońaltý ortalyqtaryna únemi baryp turatynyn aıtty.
– Baýyrmaldyq, birlik – bereke bastaýy. Ata-babalarymyz baǵzydan rýhanı qundylyqtardy joǵary baǵalaǵan. Muny «Birlik bolmaı – tirlik bolmas» degen maqal-mátel, ańyz-áńgimemen keıingilerge jetkizip keledi. Biz de qanmen sińgen ádetpen erekshe balalarǵa arnalǵan áleýmettik ortalyqqa bardyq. Jas jaýyngerler qazaqtyń handary men batyrlaryn somdap, balalar merekeni jaqsy sezindi, – dedi ol.
