Foto: J.Jumabekov
Federaldy jınalystyń Ulttyq Keńesiniń tóraǵasymen kezdesýde Erlan Qoshanov Erık Nýzbaýmerge Shveısarııaǵa resmı saparmen shaqyrǵany úshin alǵys aıtty. Májilis spıkeri Shveısarııa Qazaqstannyń Eýropadaǵy mańyzdy saıası jáne ekonomıkalyq seriktesi ekenin atap ótti.
«Qazaqstan Prezıdenti Qasym-Jomart Toqaevtyń Shveısarııaǵa 2021 jylǵy qarashadaǵy alǵashqy resmı sapary ekijaqty qarym-qatynasymyzdyń jańa taraýyn ashty. 2021 jylǵy tamyzda Qazaqstanǵa Shveısarııa Federaldy Jınalysy Ulttyq Keńesiniń tóraǵasy resmı saparmen keldi. Bizdiń búgingi saparymyz eki el arasyndaǵy parlamentaralyq dıalogty nyǵaıtýǵa septigin tıgizedi dep oılaımyz», dedi Májilis tóraǵasy.
Erlan Qoshanov óz áriptesine Prezıdent reformalary týraly aıtyp berdi. Ol sondaı-aq VIII shaqyrylymdaǵy kóp partııaly Májilis jumysy, onyń ishinde qabyldanǵan jańa zańdar týraly málimet berdi.
Májilis spıkeri qazaqstandyq taraptyń Shveısarııamen quqyqtyq saladaǵy yntymaqtastyqty damytýǵa nıeti týraly aıtty.
Taraptar dostyq toptary, komıtetter men partııalyq fraksııalar arasyndaǵy ózara yqpaldastyqty odan ári damytý joldaryn talqylady. Sondaı-aq, saýda-ekonomıka, kólik-logıstıka, ekologııa, bilim berý men ǵylym salalarynda seriktestikti qoldaý máselelerine erekshe nazar aýdardy.
О́z kezeginde Erık Nýzbaýmer Qazaqstanda júrgizilip jatqan reformalardyń mańyzdylyǵyn atap ótti. Sonymen qatar parlamentaralyq baılanystardy tereńdetýge daıyn ekenin jetkizip, dostyq toptarynyń jumysyn belsene jalǵastyrýǵa múddeli ekenin aıtty.
Sondaı-aq Shveısarııa Federaldy Jınalysy Ulttyq Keńesiniń tóraǵasy eki jaqty yntymaqtastyq máselelerin odan ári damytýǵa depýtattardyń atsalysatynyna nazar aýdardy.
Kezdesý sońynda Erlan Qoshanov shveısarııalyq shvıngen balýandaryn («qazaq kúresine» uqsas kúrestiń ulttyq túri) Astanada ótetin V Dúnıejúzilik kóshpendiler oıyndaryna qatysýǵa shaqyrdy.
Shveısarııa Konfederasııasynyń Syrtqy ister mınıstri Inıasıo Kassıspen kezdesýde Májilis tóraǵasy Qazaqstan men Shveısarııanyń áriptestigi ózara qurmet, dostyq jáne senim rýhynda, onyń ishinde parlamentter baǵyty boıynsha nyǵaıatynyna senim bildirdi.
Taraptar elder arasyndaǵy ekonomıkalyq baılanystardy damytý jaıyn da talqylady.
«Qazaqstandyq naryq – birlesken ınvestısııalyq jobalardy iske asyrý úshin tıimdi bastapqy alań. Biz Shveısarııamen erekshe jetistikke jetken salalarda tyǵyz yntymaqtastyq ornatýǵa múddelimiz. Ol – energetıka, qazba baılyqtaryn qaıta óńdeý, farmasevtıka, mashına jáne aspap jasaý, týrızm jáne qarjylyq qyzmet kórsetý salalary. Qazaqstan bıznes júrgizý úshin ońtaıly jaǵdaımen qamtamasyz etýge daıyn», dedi Erlan Qoshanov.
Májilis spıkeri Shveısarııa tarapynyń halyqaralyq arenadaǵy Qazaqstannyń bastamalaryn qoldaýyn joǵary baǵalaıtynyn jáne BUU alańynda kandıdatýralardy ózara qoldaý boıynsha yntymaqtasýdyń joǵary deńgeıin atap ótti.
Taraptar Qazaqstan azamattary úshin Shengen aımaǵynyń vızalyq rejımin jeńildetý jáne qylmystyq ister boıynsha quqyqtyq kómek týraly ózara túsinistik jóninde memorandým jasasý máseleleri boıynsha da pikir almasty.
