Aýqymdy respýblıkalyq mádenı is-shara Oqý-aǵartý mınıstrliginiń bastamasymen alǵash ret byltyr Naýryz merekesi qarsańynda ótkizilgen bolatyn. Sodan beri elimizde dombyra úıirmeleriniń sany 5 ese artqan. Búginde barlyǵy 2 myń úıirme jumys istep, 100 myńnan asa oqýshy dombyra úırenip júr. Bıylǵy aksııaǵa úıirmege qatysatyn jas dombyrashylardyń bári derlik qatysty.
«Kóneden kele jatqan bul ulttyq aspabymyz halqymyzdyń janyn, onyń dástúri men mádenıetin áspetteıdi. Ulttyń rýhyn kóterip, dańqyn asqaqtatqan qara dombyra bizdiń baǵa jetpes baılyǵymyz ben ulttyq sımvolymyzǵa aınaldy. Balabaqshalardaǵy kishkentaı búldirshinder, oqýshylarymyz, kolledj stýdentteri ulttyq aspapta oınaýǵa qyzyǵýshylyq tanytatyny qýantady. Búginde elimizdiń ár óńirinde bir ýaqytta belgili kompozıtorlardyń kúıleri men shyǵarmalary oryndaldy. Dáýlesker kúıshilerimizdiń óshpes týyndylary arqyly bizdiń mádenı qundylyqtarymyz urpaqtan-urpaqqa beriledi. Bizdiń jas býyn osy kıeli ónerdi ulyqtaýdy laıyqty túrde jalǵastyrady dep senemin», dedi Oqý-aǵartý mınıstri Ǵanı Beısembaev.
El astanasyndaǵy Raıymbek batyr atyndaǵy №50 «Qazǵarysh» mektep-lıseıiniń 300 oqýshysymen birge Oqý-aǵartý mınıstri Ǵanı Beısembaev halyq kúıi «Kelinshekti» oryndady.
Merekelik estafetaǵa elimiz boıynsha eki mıllıonǵa jýyq bala qatysty. Olardyń eń kishkentaı – Abaı oblysy, Semeı qalasyndaǵy «Baqyt» balabaqshasynyń tárbıelenýshileri.
Chellendjge qatysýshylarǵa arnaǵan sózinde sala basshysy bul is-shara byltyr qabyldanǵan «Birtutas tárbıe baǵdarlamasy» sheńberinde uıymdastyrylǵanyn atap ótti. Jalpyadamzattyq jáne ulttyq qundylyqtarǵa negizdelgen jańa baǵdarlama aıasynda kúni keshe mektep jasyna deıingi balalarǵa arnalǵan «Hantalapaı» atty ulttyq oıyndardyń respýblıkalyq baıqaýy da ótken bolatyn. 350 myńnan astam bala qatysqan is-shara ulttyq oıyndarǵa degen qyzyǵýshylyqty oıatý, halqymyzdyń mádenı murasy men dástúrlerin dáripteý maqsatyn kózdep otyr.
