Foto: Aqorda
«Dúnıejúzi turǵyndarynyń shamamen úshten bir bóligi áli de azyq-túlik tapshylyǵyn sezinip otyr. Ortalyq Azııada bıdaı óndirý boıynsha jetekshi el sanalatyn Qazaqstan óziniń aýyl sharýashylyǵy salasyndaǵy áleýetin jahandyq azyq-túlik turaqtylyǵyn qamtamasyz etý úshin paıdalanýǵa nıetti. Biz maqsatty baǵdarlamalar jasaý, birlesken agroınnovasııalyq ortalyqtar qurý jáne ınnovasııalyq tehnologııalar transferti arqyly halyqaralyq yntymaqtastyqty nyǵaıtýǵa tıispiz. Ol úshin kúsh jumyldyrýymyz kerek», dedi Memleket basshysy.
Prezıdent Azııa elderi arasyndaǵy kólik-tranzıt yntymaqtastyǵyn nyǵaıtýdyń strategııalyq máni zor ekenine nazar aýdardy.
«Qoldanystaǵy jáne jańa kólik baǵyttaryn damytý úshin barynsha kúsh-jiger jumsaý asa mańyzdy. Transkaspıı halyqaralyq kólik baǵyty nemese «Orta dáliz» osy sanatqa jatady. Atalǵan kólik baǵdary Azııa men Eýropa arasyndaǵy jetkizý tizbeginiń qaýipsizdigin áldeqaıda tıimdi qamtamasyz etedi. Byltyr osy baǵyttaǵy júk tasymaly eki ese artyp, 3 mıllıon tonnaǵa jetti. Aldaǵy jyldary bul kórsetkish 10 mıllıon tonnaǵa jetedi degen boljam jasap otyrmyz. Sondaı-aq Qazaqstan «Soltústik – Ońtústik» dálizin damytýda kórshi eldermen yntymaqtastyq ornatýǵa daıyn», dedi Memleket basshysy.
Qasym-Jomart Toqaev jahandyq ekonomıkanyń ornyqty ósimin qamtamasyz etý úshin tehnologııalyq yntymaqtastyqty, ásirese, jasandy ıntellekt salasynda yqpaldastyqty nyǵaıtý mańyzdy dep sanaıdy. Bul oraıda Prezıdent Qytaıdyń «Jasandy ıntellektini basqarý jónindegi jahandyq bastamasyn» qoldady.
Sondaı-aq Qazaqstan birlesken ınnovasııalyq IT-jobalardy júzege asyrý maqsatynda Azııanyń jetekshi tehnologııalyq alpaýyttarymen seriktestik ornatýǵa múddeli ekenin málim qyldy.
