Parıjdegi dodaǵa álemniń 205 elinen 10 myńnan asa sportshy qatysady dep josparlanǵan. Bul baıraqty básekede 32 sport túrinen 329 medal jıyntyǵy sarapqa salynady.
Elimizdiń Týrızm jáne sport mınıstrliginiń habarlaýynsha, Qazaqstan ulttyq quramasy sporttyń 20 túrinen baq synamaq. Qazirgi tańda Qazaqstan delegasııasynyń qorjynynda Parıj Olımpıadasynyń 11 sport túrinen 31 lısenzııasy bar. Atap aıtqanda, munyń altaýy – boks (erler), beseýi – nysana kózdeý, tórteýi – sadaq atý, tórteýi – semserlesý, úsheýi – tasjoldaǵy velosport, ekeýi – qazirgi bessaıys, ekeýi – taekvondo, sondaı-aq bir-birden boks (áıelder), grek-rım kúresi, erkin kúres, sporttyq gımnastıka , batýttaǵy gımnastıka sııaqty sport túrlerine tıesili.
Lısenzııa sanyn óńirler úlesine bóler bolsaq, Almaty, Shymkent qalalary men Jetisý oblysy úzdik nátıjemen kósh bastap tur. Úsheýiniń de enshisinde bes joldamadan bar. Keıingi oryndarǵa ShQO (4), Astana qalasy (3), Jambyl (2), SQO (2), Aqmola (1), Qyzylorda (1), Abaı (1), Qaraǵandy (1) jáne Túrkistan oblystary (1) jaıǵasqan. Al qalǵan óńirlerde Olımpıadanyń birde-bir joldamasy joq.
Aıta keteıik, Olımpııa oıyndaryna deıin áli 50-den asa lısenzııalyq jarys bar. Onyń ishinde sportshylarymyz álem chempıonattary, Azııa chempıonattary jáne reıtıngtik týrnırlerge qatysady.
