Jıynda Qyzyljuldyz aýylynan evakýasııalanǵan 40 balanyń Arqalyq qalasyndaǵy týystarynyń úıine ornalasqany, qazir turmysynyń jaıly ekeni aıtyldy. Qyzyljuldyz balalary 4 toqsanda Arqalyq qalasyndaǵy №5-shi mektepte oqýylaryn jalǵastyrady. Olarǵa ózderi turǵan aýyldan evakýasııalanǵan 14 muǵalim sabaq beredi. Oqý quraldarymen, keńse kerek-jaraqtarymen qamtamasyz etý máselesi sheshilgen. Búgin balalardyń bárine mektepke kıetin kıim-keshek satyp alyndy.
Al Jangeldın aýdanynda Kólqamystan kóshirilgen Aısa Nurmanov mektebiniń 44 balasy aýyldan 19 shaqyrym jerde ornalasqan Kókalat eldi mekenindegi Albarbóget mektebinde oqıtyn bolady. Olar da kıim-keshek, kitap-dápter, basqa da mektep qajetterimen qamtamasyz etilgen.
«Birinshi sáýirge deıin barlyq balalardy kıimmen, oqýlyqtarmen, keńse kerek-jaraqtarymen qamtamasyz etý qajet. Bizdiń mindetimiz – oqýshylardyń úzdiksiz bilim alýyna jaǵdaı jasaý. Ol úshin barlyq resýrsty qosamyz», dedi Qumar Aqsaqalov.
Balalarǵa arnalǵan barlyq kerek-jaraqtar jalpyǵa birdeı bilim berý qorynan satyp alynady, bul úshin barlyq qajetti qarajat bar.
Qostanaı oblysy
