Marqumnyń týystarynyń aıtýynsha, olar bolǵan jaıtqa ókinetinin aıtyp, keshirim surap barǵan, biraq olar keshirim bermeıtinin aıtyp, kináli taraptan birde-bir tıyn almaımyz dep otyr.
KTK telearnasy málimdegendeı, Nurbol Qaıypbaevty úsh balasy men týǵan-týysy keshe aqtyq saparǵa shyǵaryp saldy. Qasiretten júregi qansyraǵan ana men jesiri marqumdy joqtaýǵa shamasy kelmeı, ózderin áreń ustap otyr. Qapydaǵy ólim Nurboldyń aǵa-baýyrlaryn da biraz eseńgiretken. Olar janaza kezinde kúdiktiniń týystary aqsha usynǵanyn aıtty.
«Aldymyzdan ótti, «keshirińizder» dedi, biraq keshirim bolmaıdy dedik, sot bolady. Ádil sot bolǵanyn qalaımyz dedik. Jeńgeme «maǵan nómirin ber, aqsha salyp jibereıin» deıdi. Ondaı kómek kerek emes dedim, eshqandaı kómek kerek emes. Eldiń bári, búkil Qazaqstan bolyp jınap jatyr. «Keshirim bolmaıdy» dedim, boldy», dedi marqumnyń inisi Rýslan Qaıypbaev.
Aıybyn jýyp-shaımaq bolyp aqsha usynǵandardyń kúdiktige qandaı jaqyndyǵy bary belgisiz. О́ıtkeni onyń ákesi aqsha usynbaq túgili, kúzetshini óltirgendi tanymaımyn dep basyn ala qashqan.
Qapyda otaǵasynan aıyrylǵan jary men úsh balasyna aýyr soqqy boldy. Úlkeni 14 jasqa tolsa, kenjesiń jasy 5-te. Barlyǵy jaldamaly páterde turady. Jesir qalǵan jarynyń shotyna el azamattary qazir kóńil aıtyp, jappaı aqsha aýdaryp jatyr.
«Tergeýdiń jan-jaqty ári ádil bolýy úshin barlyq dálel-dáıekterdi jınap júrmiz. Osy turǵyda jábirlenýshilerge barynsha kómek kórsetip jatqan azamattarǵa alǵys aıtamyz. Qarjylaı kómek bergisi keletin jandarǵa aıtarymyz, marqumnyń baýyry Rýslan men jubaıy Ásemge aýdarsańyzdar, sebebi jábirlenýshilerdiń atyn jamylǵan alaıaqtar kóbeıip ketti. Abaı bolyńyzdar», dedi qorǵaýshy Asylbek Ábdiraıymov.
