– Kezinde aılyq bar, basqasy bar, yrymdap-jyrymdap, aldymyzdy oılap bankige aqsha salyp otyrǵanymyz táýir bolypty. Áıtpese myna zeınetaqy aqyr-taqyr qurtqandaı eken-á..? – dep Ildebaı qurdasyna synaı qarap edi:
– Álbette aqyldylyq bolǵan, – dep Qılybaı kelte qaıyrdy.
– Atańa nálettikin pálen jyl úzbeı aıyna aýdaryp otyrǵandaǵym qazir mardymsyz birdeńke! Álgi ınflıasııa kezinde eskeriledi degeni aıdalada qaldy. Osy sen de aıyna aýdaryp otyrdyń emes pe?
– Keıde aıyna, keıde alty aıda, keıde reti kelip qomaqtyǵa qol suǵyla qalǵanda – kesip kesek kúıinde laqtyra salatynmyn.
– Aılyǵymyz da shamalas boldy, kóldeneńimiz de kóz aldymyzda. Degenmen qazirgi turmysyń dúrildep ketkenine tańym bar?
– Kezinde «aýdaryp» durys jasappyz. Eki «bankim» birigip, záýlim saıajaı salyp berdi.
– Dáýren seniki, jylyna eki ret sanatorııge baryp saıran salasyń.
– Eki bankim jylyna kezektesip, bir retten jiberip turady.
– Taý-tasqa minetin «Djıpiń» bir bólek, bylaıǵy bylq-sylq kóligiń mynaý?
– «Djıpti» – «Jeń» banki, mynany «Dan» banki mingizdi.
– E, sen de kezinde eki bankige salyp pa ediń? Men de eki bankige, bireýine dollarmen, ekinshisine teńgemen aýdaryp turdym. Sen de sóıtken bolarsyń?
– Esimde joq... Qalaı reti keledi, solaı berip otyrdym... Olarǵa da báribir, bet-júzine qaramaıtyn, laqtyrǵanyńa rıza, az da, kóp te demeıtin.
– Baıqaımyn, qyzmettegi kezińnen qazirgi tirligiń kósh ilgeri sııaqty?
– E, ıá, bankim aman bolsyn. Barym da, bazarym da solar. Ne ishemin, ne jeımin demeńiz, tek aman-esen bolyp, uzaq ǵumyr keshińiz. Biz aman bolsaq, qamsyz ǵumyr keshesiz deıdi.
– Sonda kezinde olarǵa qansha qarajat, qansha paıyzben salyp ediń!?
– Bergenimdi qanaǵat tutty... Paıyz týraly áńgime bolmady...
– Oıpyr-aı-á, olar qaı banki edi-eı!?
– «Jeń» men «Dan» banki...
– Talaı bank boldy, «Jeń»-«Dan» degendi estimeppin..?
– «Jeń» – Jeńis – úlken ulym, «Dan» – Danııar – kishi balam...
Berik SADYR
