Qys boıy mol jaýǵan qar kúrt erip, óńirdegi ózen-kól arnasynan asardaı bolyp qar sýyna meltektep tur. Etek-jeńin jınamaǵan eldi mekenderge qyzyl sý kirip, qarbalas shaq týdy. El elegizigen shaqta qaıyrymdy jandardyń qamqorlyǵy qysylǵan jandardyń qoltyǵynan demeıtin perishte peıil ispetti. Oblys ortalyǵyndaǵy Dostyq úıinde janashyrlyq kómekti jınaıtyn oryn ashyldy. Jer-jerdegi jaısyz habardan qulaqtanyp jatqan qala turǵyndary jyly kıimder men taza tósek oryndaryn, qajetti azyq-túlikterin ákelip, tapsyryp jatyr.
– Eshkim qolqalap suraǵan joq. Shydap otyra almadyq. Qolymyzdan kóp nárse kelmese de, qara órtke sý shashqan qarlyǵashtaı demeý bolaıyq degenimiz ǵoı. Birligi bekem eldiń erteńi nurly, – deıdi qala turǵyny Esenbaı Ahmetov.
Júrek jylýynyń hosh ıisi ańqyp turǵan jınalǵan zattar tabıǵat apatynan zardap shekkenderge pyshaq ústinde úlestirilip jatyr. Aldymen oblys ortalyǵyndaǵy Elevator aýdanynyń turǵyndaryna qalalyq beıimdeý ortalyǵynda ornalasqan el kómegi jınalǵan jerden jyly kıimder, azyq-túlik taratylyp jatyr. Alǵashqy eki kúnniń ishinde 1,6 mln teńge qarajat, árqıly zattar jınalyp, qarǵyn sýdyń kesirinen zardap shekken 33 otbasyna kómek kórsetildi. Sharýashylyq taýarlary men kúndelikti óte qajetti kerek-jaraqtar jańa ıelerin tapty. Zardap shekkender men kúni-túni bel sheshpeı jumys istep jatqan qutqarý qyzmetiniń adamdaryna arnap tigilgen shatyrly qalashyqta uzyn-yrǵasy 800 myń teńge bolatyn azyq-túlik pen ystyq tamaq berildi. Qaıyrymdy júrekterdiń lúpilin sezdiretin qyrýar is áli de jalǵasa bermek.
Kókshetaý
