Kollaj: Ábilqasym Esentaev
Sybaılas jemqorlyqqa qarsy qyzmette Agenttik Tóraǵasy A. Jumaǵalıdiń basshylyǵymen sportty qarjylandyrý salasyndaǵy jemqorlyq táýekelderin joıý máseleleri boıynsha vedomstvoaralyq májilis ótti.
Májilis jumysyna Agenttik Tóraǵasy A. Jumaǵalımen birge Týrızm jáne sport mınıstri E.B. Marjyqpaev, Ulttyq olımpıadalyq komıtetiniń prezıdenti G.G. Golovkın, Astana qalasynyń ákimi J.M. Qasymbek, qarjy jáne sıfrlandyrý vıse-mınıstrleri, «Samuryq-Qazyna» AQ basshylyǵy, qoǵam qaıratkerleri, ortalyq jáne óńirlik memlekettik organdar qatysty.
Jıyn barysynda elimizde sportty damytýǵa bólinetin memlekettik qarajattyń utymsyz jáne tıimsiz jumsalýyna ákep soqtyratyn eleýli jemqorlyq táýekelderi men faktorlarynyń bolýyn kórsetken syrtqy taldaý nátıjeleri talqylandy.
Agenttik 2024 jyldyń basynan beri sport salasynda 39 jemqorlyq qylmysyn tirkedi.
Tek sońǵy 6 jylda atalǵan saladaǵy bıýdjet 2 ese ósip, 1,4 trln teńgeni qurady. Osyǵan qaramastan, Qazaqstannyń álemdik sporttaǵy kórsetkishteri quldyrap barady.
Osy sala bıýdjetiniń 90%-y jumsalatyn «joǵary jetistikter» jáne «buqaralyq» sportty qarjylandyrý arasynda teńgerimsizdik baıqalǵan.
«Qarjylandyrýdaǵy dısproporsııa jemqorlyq shemalaryna negiz boldy. Eger buqaralyq sportta qazir sıfrlandyrylǵan jan basyna shaqqandaǵy qarjylandyrý baǵdarlamasy jumys istep tursa, onda joǵary jetistikter sportynda ashyq emes jáne sýbektıvti tólemder, az baqylaý, affılırlengen qatysýshylar, jalǵan oqý-jattyǵýlar jáne qosarlanǵan qarjylandyrýǵa jaǵdaı jasalǵan», dedi Agenttik Tóraǵasy.
Sporttyq prosesterde sıfrlandyrýdyń bolmaýy jemqorlyq quqyq buzýshylyqtar men qarajattyń jymqyrylýyna qolaıly jaǵdaı týǵyzady.
Máselen, eki jyl buryn josparlanǵan «E-sport» aqparattyq júıesi osy ýaqytqa deıin iske qosylmaǵanyn aıta ketý kerek. Odan bólek «Sport sheberi» jalǵan ataǵyn berý derekteri anyqtaldy.
Májiliste Qazaqstandaǵy sportshylardy natýralızasııalaý, kásibı klýbtardyń bıýdjetterin qalyptastyrý jáne legıonerlerge tólemderdi qarjylandyrý máseleleri talqylandy.
El Prezıdentiniń bıýdjet pen jalaqy mólsherin shekteý jónindegi tapsyrmasyna qaramastan, elimizdiń fýtbol kásipodaq klýbtary sońǵy 3 jyl ishinde 30 mlrd teńgeden astam ústeme aqy tóledi. Sonymen qatar óziniń sporttyq ınfraqurylymyn damytýdyń ornyna bıýdjet qarajaty legıonerlerge tólem jasaýǵa jáne sport nysandaryn jalǵa alýǵa jumsaldy.
Taldaý qorytyndysy boıynsha Agenttik salalyq mınıstrliktiń atyna jemqorlyq táýekelderin joıý boıynsha usynymdar engizdi.
