Foto: Qazaqsan halqy Assambleıasy
QHA músheleri bastaǵan «Júrekten júrekke» arnaıy jobasy aıasynda Aqmola jáne Qaraǵandy oblystaryna gýmanıtarlyq kómek jiberildi.
Gýmanıtarlyq júktiń birinshi bóligi Qaraǵandy oblysynyń Shet aýdanyna jetkizildi. Ony QHA tóraǵasynyń orynbasary Aqbarjon Ismaılov pen «Assambleıa jastary» uıymynyń tóraǵasy Tımýr Jumyrbaev jetkizip berdi. Olar azyq-túlik jıyntyqtaryn, kıim-keshek pen basqa da qajetti zattardy halyq arasynda bólýmen aınalysty.
Gýmanıtarlyq júktiń taǵy bir bóligi Aqmola oblysynyń Dostyq úıine jetkizildi. Keıbir zattar evakýasııalyq pýnktterge jiberildi. Assambleıa senatorlary Álisher Satvaldıev pen Gennadıı Shıpovskıı jergilikti halyqpen kezdesip, aǵymdaǵy jaǵdaımen tanysty. Jıyn barysynda zardap shekkenderdiń suraqtaryna jaýap berildi.
QHA respýblıkalyq shtabynyń músheleri sý tasqynynan zardap shekken basqa óńirlerge de baryp, turǵyndarǵa qol ushyn sozady. Qutqarýshylar men eriktiler úshin ystyq tamaq usynylady.
Aıta ketsek, elimizdiń barlyq óńirinde Dostyq úıleriniń bazasynda shtabtar, eriktiler ortalyqtary, gýmanıtarlyq kómek qabyldaý pýnktteri uıymdastyrylǵan. Búginde QHA-nyń kómegimen 110 mln teńgeden astam somaǵa gýmanıtarlyq kómek jınalǵanyn da aıta ketý kerek.
