Povest 1957 jyly jazylyp, 1963 jyly ekrannan kórermenge jol tartty. Al 1967 jyly fransýzdyń áıgili Kann festıvalinde «Balalarǵa arnalǵan eń úzdik shetel fılmi» atalymyn jeńip aldy. Bul – qazaq kıno salasyndaǵy tuńǵysh júlde. Shyǵarmanyń jaryq kórgen jyly tyń ıgerý jyldarymen tuspa-tus keledi. Qazaq jeri hantalapaıǵa túsken sátte basty keıipkerdiń esimi basqa emes, Qoja bolýynda da úlken mán-maǵyna jatyr. Iаǵnı «Eldiń, jerdiń qojasy – men» degen oı menmundalap tur.
Taǵy bir qyzyǵy, basty keıipkerdi somdaǵan Nurlan Sanjardyń fılmde óz daýysy joq. Onyń aıtýynsha, segizinshi synypqa deıin «r» dybysyna tili kelmegendikten, oryssha nusqasynda onyń rólin Marına Vınogradova, al qazaq tilinde Farıda Sháripova dybystaǵan.
«Taqııaly perishte»
«Joq. Jalǵyzbasty erkektiń kúni qurysyn. Janashyr anasy bolý kerek ne bolmasa áıeli». Osy bir oıdan bastaý alatyn bul fılmniń sıýjeti jeńil bolǵanmen, aıtar oıy tereń, oqıǵasy oınaqy, keıipkerleri halyq ómirine etene jaqyn.
Sháken Aımanov «Taqııaly perishtesin» 1965 jyly balýandar saıysynan tapqan. Ol balýan ózderińiz biletin – Álimǵazy Raıymbekov. Sonymen qatar bul fılmde Bıbigúl Tólegenovanyń «Ana» ánin oryndaıtyn epızody bar. Biraq ol daýys Baqyt Áshimovanyń daýysy bolatyn. Bul – rejısserdiń sheshimi edi.
O basta fılm kompozıtory Aleksandr Zasepın «Ana» ánin orystyń belgili ánshisi Maııa Krıstalınskaıaǵa arnaǵan. Fılmdi qazaqshalaǵanda sol daýysty negizge ala otyryp jáne úni men máneri uqsas bolǵandyqtan Baqyt Áshimovany tańdaǵan.
«Qyz Jibek»
Ssenarııin Ǵabıt Músirepov jazyp, Sultan Qojyqov rejısserlik etken, Nurǵısa Tilendıev pen Qadyr Myrza Álı, Gúlfaırýz Ismaıylova sııaqty ózi isiniń maıtalmandary atsalysqan «Qyz Jibek» kórkem fılmi – ulttyq ónerdiń teńdessiz oljasy.
1944 jyly jazylǵan ssenarıı boıynsha «Qyz Jibek» fılminiń alǵashqy ataýy «Aqqý» bolǵan. Keıin araǵa jyldar salyp, shyǵarmashylyq úrdis naqty óndiriske ulasqanda «Aqqý» ataýyn «Qyz Jibek» almastyrǵan. Fılminiń tusaýy 1970 jyly Almaty qalasyndaǵy «Selınnyı» kınoteatrynda kesilgen bolatyn. Al basty keıipker Jibektiń rólinde oınaýǵa tórt júzge jýyq úmitkerden usynys hat kelip túsipti. Olardyń ishinde on bes qyz ǵana irikteýden ótip, onda da tek Jibektiń serikteri retinde tańdalǵan.
