Qaratomar, Joǵarǵy Tobyl, Jelqýar sý qoımalary mamandardyń baqylaýynda.
«Tobyl ózenindegi sý deńgeıiniń kóterilýi jáne eldi mekenderdi sý basý qaýpine baılanysty ótken demalys kúnderi bar kúsh Qostanaı qalasy men Qostanaı aýdanyna jumyldyryldy. Osy rette erigen sýdy burý úshin aryq daıyndaý, ınertti materıaldar salynǵan qaptardy tóseý, sýdy sorý, jaǵalaýlardy nyǵaıtý sııaqty jumystar júzege asyryldy. Sý tasqyny kezeńinde shamamen 774 822 myń m3 erigen qar sýy sorylyp, 74 299 myńnan astam qap jáne 7265 tonna ınertti materıal tóseldi.
8878 adam, onyń ishinde 11 múmkindigi shekteýli adam jáne 1765 bala qutqarylyp, evakýasııalandy. 464 adam, onyń ishinde 123 bala ýaqytsha ornalastyrý pýnktterine ornalastyryldy», dep habarlady oblystyq jedel shtab ókilderi.
Fedorov, Qarabalyq, Qarasý, Qostanaı, Áýlıekól, B.Maılın, Qostanaı aýdandarynda erigen qar sýyn sorý, qap tóseý jumystary júrip jatyr. Atqarylǵan jumystar men is-sharalar nátıjesinde B.Maılın aýdanynyń turǵyndary úılerine qaıta oraldy.
Oblysta 135 evakýasııalyq pýnkt bar, olar sý tasqynynan zardap shekkenderdi ýaqytsha baspanamen, tamaqpen, medısınalyq kómekpen jáne qajetti materıaldyq resýrstarmen qamtamasyz etedi.
Eriktiler men qala turǵyndary sý tasqynyna qarsy kúreste táýlik boıy jumys istep, aıtarlyqtaı kómek kórsetip jatyr. Volonterler kommýnaldyq qyzmet jumysshylaryn, memlekettik jáne quqyq qorǵaý organdarynyń kezekshi qyzmetkerlerin ystyq tamaqpen, shaımen qamtamasyz etip jatyr.
Qostanaı oblysy
