Memleket basshysy Qasym-Jomart Toqaev oblystar men qalalardyń ákimderine aýmaqtardy abattandyrý, kógaldandyrý jóninde birqatar tapsyrma berdi. Onyń ishinde cý tasqynyna ushyramaǵan oblystar men qalalardyń ákimderine kóshelerdi tazartý, kógaldandyrý jáne eldi mekenderdiń aýmaqtaryn abattandyrý naýqanyn bastaýdy tapsyrdy. Sonymen qatar joldardy retke keltirý mindeti júkteldi. Osyǵan oraı qolǵa alynǵan aksııanyń alǵashqy jumasy «Taza ólke» dep atalyp, óńirlerdegi turǵyndar men qoǵam belsendileri, mekemeler óz aýla-jaıyn tazartýǵa kiristi. 20 sáýirge deıin jalǵasatyn naýqannyń ekinshi aptasyna «Kıeli meken» ataýy berilgen. Bul kúnderi tarıhı-mádenı eskertkishter aýmaǵyn abattandyrý jumystary júrgiziledi. 27 sáýirge deıingi úshinshi jumaǵa «Jasyl aımaq» taqyryby qoıylyp, kóshetter otyrǵyzylyp, aǵashtardyń túbi ákteledi. «О́negeli urpaq» deıtin tórtinshi aptada ardagerler saraıy men qarttar úıleriniń aýmaqtaryn tazartý kózdelgen. Sońǵy besinshi aptada «Móldir bulaq» ataýymen ózen-bulaqtardyń arnasy qoqystan tazartylady.
«Negizgi maqsat – halyq arasynda qoǵamdyq jáne ekologııalyq mádenıetti qalyptastyrý, otansúıgishtik, týǵan jerge jáne qorshaǵan ortaǵa degen janashyrlyq pen qurmet qundylyqtaryn dáripteý. Onyń aıasynda qystan keıin eldi mekenderdi tazartý jáne abattandyrý jumystaryna azamattardy keńinen tartý jáne osy is-sharalarǵa belsendi jastardyń, eriktilerdiń áleýetin jumyldyrý kózdelip otyr. Jalpy, eldi mekenderdi abattandyrý jumystary dástúrli túrde júrgiziledi. Biraq dál osyndaı formatta aksııa alǵashqy ret uıymdastyrylyp otyr. Is-sharalar óńirlerdiń ózindik josparyna sáıkes apta barysynda ótkiziledi. Negizgi ekpin – árbir aptanyń senbisi. Iаǵnı halyqtyń ártúrli sanatyn keń qamtýymen ótkiziletin negizgi taqyryptyq is-sharalar dál osy kúni ótkizilýge tıis. Sonymen birge aksııa aıasyndaǵy aptanyń árbir kúni jekelegen óńirdiń bastamalary júzege asady. Mysaly, 8 sáýir – Almaty qalasy, 9 sáýir – Qyzylorda oblysy, 10 sáýir – Jambyl oblysy, 11 sáýir – Túrkistan oblysy, 12 sáýir – Shymkent qalasy jáne taǵy sol sııaqty», dedi Mádenıet jáne aqparat mınıstrligi Jastar jáne otbasy isteri komıtetiniń tóraǵasy Qaırat Qambarov.
Joba elordada 13 sáýir men 11 mamyr aralyǵynda «Taza Qazaqstan. Astana – tazalyq pen tártiptiń úlgisi» ataýymen ótedi. Ekologııalyq aılyq aıasynda qalany, nóser jáne aryq káriz jelilerin sanıtarlyq tazartý, kóshelerdi, trotýarlar men aýmaqtardy, saıabaqtar men skverlerdegi jasyl jelekterdi kútý boıynsha maýsymdyq agrotehnıkalyq jumystar júrgiziledi. Sondaı-aq 270 myńnan astam aǵash otyrǵyzylmaqshy.
Búginde aksııaǵa óńirler de birtindep qosylyp jatyr. Máselen, Almaty qalasyndaǵy alǵashqy is-shara «Almaty – bizdiń ortaq úıimiz» jalpyqalalyq naýqany aıasynda ótti. Alyp shahardyń 8 shaǵyn aýdanynda kommýnaldyq qyzmetter men merdigerlik uıymdar saıabaqtar men parkterde tazalyq jumystaryn júrgizdi. Almaty qalalyq mobıldilik basqarmasy men aýdan ákimdikteri bir aıda 480 baǵdarsham, 1 765 aıaldama pavılonyn retke keltirip, 300 myń sharshy metr joldy jóndeýge kirisedi.
«Bizdiń qala – bizdiń aýla, bizdiń úı» aptalyǵynda 20 myńnan astam aǵash pen buta kósheti otyrǵyzylady. Aǵash otyrǵyzamyn degenderge kóshet, al jeke úılerdiń qorshaýyn syrlaǵysy keletinderge boıaý beriledi. Osy kezeńde tabıǵatty saqtaýǵa arnalǵan túrli shyǵarmashylyq ári ekologııalyq is-shara ótedi. Onyń qatarynda dámhanalar men meıramhanalardan tamaq qaldyqtaryn jınaý, merzimi ótken dári-dármekti ótkizý sııaqty jobalar bar. Munyń barlyǵy qorshaǵan ortany saqtaýǵa baǵyttalǵan. Jalpy, naýqan bir aıǵa sozylady. Oǵan kommýnaldyq qyzmettiń jumysshylary ǵana emes, qala turǵyndary da, kásipkerler de qolynan kelgenshe atsalysa alady. Osynda turyp jatqan árbir adam – qalanyń bir bólshegi. Eger bárimiz shahardyń tazalyǵyna, kógaldandyrýǵa úles qossaq, Almatymyz budan da kórkeıe túsedi», dedi Almaty qalasy Áýezov aýdandyq kóriktendirý bóliminiń bas mamany Ertaı Qurmanǵalıev.
Al Túrkistan oblysynda joba aıasynda 200 myńnan asa kóshet otyrǵyzyldy. Is-shara «Senbilik – tazalyq aınasy» ataýymen uıymdastyrylyp, jergilikti ákimdikter, barlyq memlekettik mekeme men kásipkerlik uıymdar, eriktiler, aýdan, qaladaǵy jastar ortalyqtary da atsalysty. Abattandyrý, kógaldandyrý jáne tazalyq jumystaryn sapaly júrgizbegen bılik ókilderine syn-eskertpe de aıtyldy. Másele Túrkistan oblysy ákimi apparatynyń aptalyq májilisinde arnaıy qaraldy.
Oblys ákiminiń birinshi orynbasary Zulpyhar Joldasovtyń aıtýynsha, Memleket basshysynyń osy salaǵa qatysty tapsyrmalaryn oryndaý maqsatynda 2024–2026 jyly qalalardy kógaldandyrý jáne abattandyrý jol kartasy bekitilgen.
Aksııany qoldaǵan Ulytaý oblysyndaǵy 437 eńbek ujymynan 6 myńnan astam aǵaıyn senbilikke shyǵyp, 110 arnaıy tehnıka jumyldyrylyp, 470 gektar aýmaq qoqystan tazartylypty. Jańa qoqys jáshikteri ornatylyp, 965 aǵashtyń qýraǵan butaqtary kesilgen.
Qorshaǵan ortanyń tazalyǵyna jaýapkershilikpen qaraý – ár azamattyń basty mindeti. Muny eskergen shymkenttikter de «Taza Qazaqstan» aksııasy aıasynda tazalyq jumystaryn bastady. Jıylǵan jurt kóshelerdi sypyryp, aryqtar men jol jıegindegi qoqystardy jınap, aıaldamalardyń árin keltirdi.
