Atalǵan bilim ordasynda stýdentterge Ǵalı Ormanov kitaphanasynan jańa qurylǵylarmen jabdyqtalǵan úlken bólme qoldanysqa berildi. Saltanatty jıynǵa oqytýshylar men bilimger jáne «Huawei» kompanııasynyń ókilderi qatysty. Áýeli JÝ-diń rektory Ermek Bóribaev pen «Huawei Technologies Kazakhstan» kompanııasy bas dırektorynyń orynbasary Xu Hai bilim oshaǵy men kompanııa arasynda yntymaqtastyq ornatý jónindegi memorandýmǵa qol qoıyp, aldaǵy atqarylar jobalarǵa baǵa berdi.
Memorandým aıasynda eki tarap birlesip, IT jáne telekommýnıkasııa salasynda joǵary bilikti mamandardy daıarlaıdy. Sondaı-aq birlesken bilim baǵdarlamalaryn ázirlep, ǵylymı zertteýler júrgizýge ýaǵdalasty. Oǵan qosa ınnovasııalyq ónimder jasaý kózdelgen.
«Stýdentter úshin qazir múmkindik kóp. Olar kishkentaı ǵana terezeden bilimniń qaınar kózin taýyp, sony tıimdi paıdalana alýlary tıis. Olardyń bilim alýyna biz barlyq jaǵdaıdy jasaımyz. Túrli tehnologııany paıdalanyp, óz bilimderin shyńdaý kerek. Bilimde shekara joq. Jastar osy múmkindikti ornymen paıdalansa, jetistikke jetetini anyq», deıdi Xu Hai.
«Huawei» ortalyǵy zamanaýı telekommýnıkasııalyq qurylǵylarymen jáne baǵdarlamalyq ónimderimen tolyq qamtylǵan. Akademııada Jetisý ýnıversıtetiniń stýdentteri, IT salasynyń mamandary aqparattyq tehnologııalar men telekommýnıkasııa boıynsha bilim alyp, biliktiligin arttyrady.
«Búgin bir úlken jańalyqtyń kýágeri bolyp otyrsyzdar. «Huawei» kompanııasynyń qoldaýymen úlken akademııa ashylyp jatyr. Bul oqý ordasy bilimgerleriniń sandyq bilimderin damytýǵa baǵyttalǵan. Osy akademııa oblystyń órkendeýine jaqsy jańalyqtar alyp keledi dep oılaımyz. Munda sabaq beretin muǵalimder akademııanyń bazasynda tolyq oqýdan ótti, endi alǵan bilimderin stýdentterge úıretýge daıyn. Biz «Huawei» kompanııasymen áli de birlesip jumys istep, ortalyqty damytýǵa kúsh salamyz», dedi ýnıversıtet rektory E.Bóribaev.
Endi ýnıversıtet oqytýshylary men stýdentteri «Huawei» kompanııasynyń bólimderinde taǵylymdamadan, óndiristik jáne ǵylymı zertteý tájirıbelerinen óte alady.
Jetisý oblysy
