Bala kezimizde kóbimiz aqyn bolsaq, jazýshy bolsaq dep armandadyq qoı. Armanǵa alyp ushqan sábı kóńildiń shabyty qanshama óleń týdyryp, kúndelik dápterimizge osyndaı qanshama qııalshyl oı jazǵyzdy. «Balǵyn daýys» kitaby da 6-synyp oqýshysy Gúlsimniń qalamyna qýat bergen armanynan týyp, jaryq kórdi. Jınaqqa onyń óleńderi, áńgimeleri, kúndeligi engen. Kitap «О́mir tolqyny», «Alǵashqy armandar», «Balaýsa jyrlar», «Balǵyn shaqtyń belesteri» atty tórt bólimnen turady. Ár bólimde oqyrmannyń qııalyna qanat bitiretin, adamdyq qasıetterge baýlıtyn, shabyttandyratyn, jaqsy oılarǵa jeteleıtin kirshiksiz týyndylar bar. Máselen myna bir:
«Týǵan jer, týǵan ólkem, baıtaq dalam
Sen dese kóńilimde shattyq qadam.
Sen bergen qyzyqty ómir, mol baılyqty
Igerip, týǵan Otan, berem saǵan», –
degen óleń joldary árqaısymyzdyń moınymyzda Otan aldyndaǵy perzenttik paryzymyz baryn eske salady. Al kishkentaı oqyrmannyń boıyna týǵan jerdiń qasıetti ekenin túsindirip, otanshyldyq dánin sebedi.
«Danany mamasy ázer oıatty...», dep alańsyz bastalǵan jeksenbiniń tańyndaǵy oqıǵany baıandaıtyn áńgimede balany eńbekke baýlıtyn úlken mán jatyr. Alǵash ret ózi nan pisirgen Dana maqtaý estip, anasynyń rızashylyǵyn alyp, eńbektiń nany tátti ekenin túsinedi. Mine, kitapta osy saryndas adamı qundylyqtarǵa negizdelgen, balalardyń tanym kókjıegin keńeıtetin áńgimeler, óleńder bar. Onyń barlyǵy – bala júrekten shyqqan sondaılyq shynaıy týyndylar. Sondyqtan bul kitaptaǵy ár shyǵarma óz oqyrmanyna oı salyp, izgilikke baǵyttaıtyny anyq.
