Foto: Atyraý oblysynyń TJ jónindegi jedel shtab
Qazirgi ýaqytta Atyraý qalasynyń mańynda ornalasqan, Jaıyq ózeni men Kaspıı teńizi arasyndaǵy mańyzdy arterııa – Sokolok kanalyn tereńdetý jáne keńeıtý jumysy qarqyndy júrgizilip jatyr, onyń uzyndyǵy – 24 shaqyrym. Arna keńeıtilip, qalǵan topyraq bógetterdi nyǵaıtýǵa qoldanylady. Sondaı-aq, atalǵan kanal janynan qosymsha kanal salynyp jatyr. Sokolok kanalynan sý tasyp ketken bolsa, ekinshi kanal rezervtik gıdrotehnıkalyq qurylys qyzmetin atqarady. Qazir 12 shaqyrymy aıaqtaldy.
Atyraý qalasy boıynsha ǵana jaǵalaýdy nyǵaıtý bógetterin salýǵa 1 myńǵa jýyq arnaıy tehnıka, 3,2 myń túrli mekemelerdiń qyzmetkeri jáne 3,5 myńnan astam erikti jumyldyryldy.
Jergilikti tórt kompanııanyń kúshimen Qaraózek kanalynyń jaǵalaýyn bekitý jumystary júrgizilip jatyr. Onyń uzyndyǵy 35 shaqyrymnan astam – Atyraý-Oral tas jolynan Erkinqala aýyldyq okrýgine deıin. Bul kanal Jaıyqtyń bir salasy bolǵandyqtan ózen úshin erekshe mańyzdy. Munda bógetterdi nyǵaıtý (qosymsha 1,5-2 metrge kóteriledi), arnany, kópir ótkelderi men shlıýzderdi tazartý jumystary júrgizilip jatyr. Sonymen qatar, sońǵy jyldary sharýa qojalyqtarynyń qojaıyndary kanal arqyly qubyrlar men topyraqtan ótkelder júrgizgen, olar qazir sýdyń ótýin jaqsartý maqsatynda ashylyp jatyr.
Qaraózek kanalynyń jaǵalaýyn bekitý jumystaryna tórt kompanııadan 350 adam, 50-80 jergilikti turǵyn men eriktiler, sondaı-aq 70-ten astam arnaıy tehnıka jumyldyrylǵan. Osy tusta aıta ketsek, josparlanǵan jumystar aıaqtalǵannan keıin atalǵan kompanııalar mol sýdyń kelýi kezinde baqylaýdy jalǵastyrady. Al qajet bolǵan jaǵdaıda qıyn aımaqtarǵa tartylady.
Jalpy, qala irgeles aýyldyq okrýgterimen birge 107 ýchaskege bólinip, árqaısysyna jaýapty tulǵa bekitilip, atqarylǵan jumystar týraly aqparat kún saıyn jańartylyp otyr. Sý tasqynyna daıyndyq jumystaryna Ishki ister mınıstrligi men Qorǵanys mınıstrliginiń Ulttyq Ulan bólimsheleri jumyldyryldy, basqa óńirlerden tehnıkalar kelip jatyr, óńirdegi iri munaı kompanııalarynyń kúshteri men quraldary da jumyldyryldy. Sonymen qatar, Memleket basshysynyń tapsyrmalaryn oryndaý aıasynda jergilikti kásipkerlik sýbektileri belsendi atsalysyp jatyr.
