Foto: dalanews.kz
Kúni keshe Shyǵys Qazaqstannyń jurty sýdan zardap shekken Soltústik Qazaqstan oblysyna gýmanıtarlyq kómek jóneltti. Birneshe kún buryn Dostyq úıi men óńirlik volonterler front-ofısi qaladan eki beket ashyp, bir apta ishinde 20 tonnaǵa jýyq gýmanıtarlyq kómek jınady. Kómek kórsetýge jastar jáne volonterlik uıymdar, etnomádenı birlestikter, kásipkerler, joǵary oqý oryndary men oblys turǵyndary belsene qatysty.
– Tilsiz jaýdan zardap shegip jatqan turǵyndardyń jaǵdaıy janymyzǵa batty. Baspanadan, mal-múlikten aıyrylý – ońaı emes. Tabıǵattyń tosyn minezinen zardap shegip jatqan óńirlerge az da bolsa, qolushyn bereıik dep «Júrekten – júrekke» atty aksııa bastaǵan edik. Búgin Soltústik Qazaqstan oblysyna gýmanıtarlyq kómek jiberiledi. Turǵyndardyń kómegimen 20 tonnaǵa jýyq azyq-túlik, tósek-oryn, basqa da qajetti zattar jınaldy, – deıdi ShQO Qazaqstan halqy Assambleıasy «Teatr-all» jastar teatrynyń kórkemdik jetekshisi Nazerke Aıdynova.
Kómek jınaýǵa oblystyń memlekettik mekemelerinen bólek basqa da azamattar, kásipkerler atsalysty. Máselen, Kúrshim, Altaı aýdandarynyń turǵyndary azyq-túlik jetkizse, «Normal Nomad» JShS 5 tonna un bólgen. Al Halıfa Altaı oblystyq meshiti kómek berip qana qoımaı, gýmanıtarlyq zattardy jetkizý úshin arnaıy kólikpen de qamtamasyz etti.
– Qarjylaı qoldaý kórsetken kásipkerler de boldy. Osy oraıda qolushyn sozǵan barlyq óńir jurtyna shyn júrekten alǵys aıtqym keledi. Búgin Shyǵystan kómek jóneltiledi. Biraq biz osymen gýmanıtarlyq kómek jınaýdy toqtatpaımyz. Sebebi tótenshe jaǵdaı jarııalanǵan óńirlerge áli de kómek kerek. Olarǵa qolymyzdan kelgenshe azyq-túlikpen, dári-dármekpen qoldaý kórsetip, qıyn shaqta demeýimiz kerek. Biriksek qana barlyǵyna tótep beremiz, – dedi shtab tóraǵasy Ravıl Iýnýsov.
Kómek qolyn sozýda oblystyń ýnıversıtetteri de qalys qalǵan joq. S.Amanjolov atyndaǵy Shyǵys Qazaqstan ýnıversıtetiniń ujymy sý basqan óńirlerdiń turǵyndaryna birkúndik jalaqylaryn aýdarý týraly sheshim qabyldady. Aıta keteıik, ShQÝ-da myńǵa jýyq adam eńbek etedi. Buǵan deıin oqý orny ujymy Aqtóbe oblysyna gýmanıtarlyq kómek jóneltken. Atap aıtsaq, azyq-túlik, sýdy tazartatyn súzgiler, gıgıenalyq zattar, turmystyq hımııa, dári-dármekter, kórpe-jastyqtar bar.
Al Qazaq-Amerıka erkin ýnıversıteti ujymy Qostanaı oblysynyń turǵyndary úshin gýmanıtarlyq kómek jınady. Olar oblystyq eriktiler front-keńsesine zardap shekken turǵyndarǵa qajetti-aý degen zattardy satyp alyp, tapsyrdy. Mysaly, jańa tósek-oryn jınaqtary (jastyqtar, kórpeler, matrastar), súlgiler, ystyq tamaq termostary, turmystyq kerek-jaraqtar jáne basqa zattar.
– Bizdiń ýnıversıtette qıyn jaǵdaıǵa tap bolǵandarǵa qajetti qoldaý kórsetýge árqashan daıyn. О́tken jyly tabıǵı órtpen kúresken kezde QAEÝ-de Abaı oblysyna gýmanıtarlyq júk jınalyp, jóneltildi. Búgin oblystyq eriktiler front-keńsesine sý tasqynynan zardap shekkender úshin barlyq qajetti zattardy tapsyrdy. Gýmanıtarlyq kómek Qostanaı oblysyna jiberiledi, – dedi QAEÝ jastar saıasaty jónindegi prorektory Natalıa Ýrazova.
Iá, joǵaryda aıtyp ótkendeı gýmanıtarlyq kómek jınaý jumystary Shyǵysta osymen toqtamaıdy. Atalǵan mekenjaılar boıynsha kómek jınaý jumystary jalǵasyn taba bermek.
Shyǵys Qazaqstan oblysy
