Iá, ǵashyqtyq – uly sezim. Súıgenin tutas bolmysymen qabyldaýǵa júrektiń batyldyǵy qajet. Sezimge selkeý túsiretin nárseniń biri – sharttylyq. Hakimderden qalǵan hıkmet bar. Kún jerge jaryq berip turǵanyna qaı zaman? Sodan beri ol jerge kelip birde-bir ret: «qashanǵy saǵan jaryǵym men jylýymdy tóge beremin? Sen de bir ýaq shýaǵyńdy shashsańshy» dep aıta ma? Joq. Kúnniń mahabbaty shartsyz. Adam balasy da osy kúnge uqsaýy kerek...
Osy oraıda myna bir óleńdi ónege, tálimdi támsildiń oıǵa oralyp otyrǵany. Birde baıaban shóldi kezip, aryp-ashqan bir jolaýshy mahabbat qaqpasyn qaǵady. Qaqpanyń arǵy jaǵynan áýez keledi.
– Bul kim eken suraýsyz qaqqan esik?
– Menmin, – dedi jolaýshy taq-taq etip. Sol kezde mahabbat óktem únmen jaýap qatady:
– O, beıádep! Ashpaımyn qaqpa saǵan. Saǵan aram múbárak taq-bosaǵam! – Jolaýshy ańtarylyp qalady da, Májnúndeı eńirep aıdalaǵa mańyp ketedi. Jalǵyz kezip baıaban shóldi kúnde, ókinishpen óletin boldy múlde. Talaq qylyp ishtegi óz qalaýyn, qandy jaspen sýardy kóz janaryn. Aı aýysyp, jyldar kóshken soń, rýhanı kámeletke jetken soń jolaýshy mahabbattyń qaqpasyn qaıta qaǵady.
– Bul kim eken suraýsyz qaqqan esik? Alatyndaı quddy men jaqqa kóship, – kútkenindeı sol sátte shóldiń jaýyn:
– Senmin, – dedi jolaýshy, – senmin, janym!
Naǵyz ǵajaıyp osy kezde ornaıdy. Appaq esik ashyldy ósken gúl bop, appaq álem shaqyrdy «Qosh keldiń!» dep. Sodan jolaýshyǵa súıinshi áýez keledi:
– Qylyp iship ap-ashy jasty shyryn,
Mahabbattyń taýypsyń basty syryn!
Alǵysharty osy-dúr asyl zańnyń:
«Men» degen joq tilinde ǵashyq jannyń.
Iá, ǵashyqtyq degen – bolmys birligine umtylý. Bul hálge jetken baqyt ıeleri «men» dep emes, «biz» dep sóıleıdi. Shaıda erigen shekerdeı, jarynyń júregine máńgilik sińip ketedi naǵyz ǵashyqtar...
