Eń, eń, eń... Kishkentaı kitaphana

Qazir baılanys quraldarynyń ja­ńarýyna baılanysty telefon úı­shik­terine suranys burynǵydaı emes. Sol sebepti «British Telecom» kompanııasy olardy ıemdenem deýshilerge ashyq saý­da jarııalaǵan. Ýestberı-sab-Mendıp qalasynyń turǵyndary úıshikterdi satyp alyp, kitaphanaǵa aınaldyrǵan. Iаǵnı oǵan arnaıy sórelerdi qoıyp, árkim ártúrli taqyryptaǵy qyzyqty shyǵarmalaryn jaıǵastyrǵan. Árıne, munda kitaphanashy joq. Adamdar izdegen kitabyn alyp, oqyp bolǵannan keıin qaıtadan ornyna qoıady. Qalashyqtyń turǵyndar sany shamamen 800 adam. Biraq kitaphananyń tanymal bolýyna baılanysty keı kezderi uzynsonar kezek bolady eken.

Qymbat kitap

Qymbat kitaptardyń kóshin bas­tap turǵan – «Lester Kodeksi». Ol Leonardo da Vınchıdiń ǵylymı eńbekteriniń jınaǵy. Kitapty 1994 jyly ótken aýksıonda Bıll Geıts 30,8 mln dollarǵa satyp al­ǵan.

Jetpis eki bettik kitapta ártúrli este­likter, sýretter, matematıkalyq esepter jınaqtalǵan. Al ataýy alǵash tutynýshy Lesterdiń qurmetine qoıylǵan. Kitapty onyń urpaqtarynan 1980 jyly sırek kezdesetin zattardyń kolleksıoneri Armad Hammer esimdi azamat satyp alǵan. Tipti az ýaqytqa bolsa da shyǵarmanyń ataýyn «Hammer Kodeksi» dep te ózgertken. H.Armad dúnıeden ótkennen keıin, 1994 jyly kitap aýksıonǵa qoıylyp, ony «Microsoft» kompanııasynyń negizin qalaýshy Bıll Geıts satyp alǵan. Alaıda ol kitapty úıinde saqtap qoıǵan joq. Halyqaralyq kórmeler kezinde «Lester Kodeksi» áli kúnge deıin kitapsúıer qaýymǵa tanystyrylyp keledi.

Qyzyq kitap

Mádenıet – oqylǵan kitaptyń sany emes, óziń túsingen kitaptyń sany. Tom-tom kitaptyń túıini bir ǵana sóılemde turýy múmkin. Sol sóılemnen baıqaýsyzda ótip ketseńiz, onda ókinishti. Al bizdiń aıtqymyz kelip turǵan kitap – aqshańyzǵa shyǵyn bolǵanymen, ýaqytyńyzǵa únem.

Bul – ataqty golland dárigeri German Býrgaveniń «Medısına óneriniń jalǵyz hám tereń syry» atty kitaby. 1738 jyly dárigerdiń ózi qaıtys bolǵannan keıin kitap aýksıon kezinde 10 myń dollarǵa satylady. Satyp alýshy ádemi bezendirilgen jáne qulyptalǵan 100 betten turatyn kitapty ashqanda, barlyq beti bos bolyp shyqqan. Tek alǵashqy betinde ǵana «Basyńdy sýyqta qaldyrsań da, aıaǵyńdy jyly ustasań, sen eń bilikti dárigerlerdi de kedeı etesiń» dep jazylǵan bir ǵana sóılem bolypty.