Batys Qazaqstan oblystyq Tótenshe jaǵdaılar departamentiniń aǵa ınjeneri Nurjan Tóleýishtiń aıtýynsha, óńirde Bórli aýdanynyń – 9, Báıterek aýdanynyń – 20, Terekti aýdanynyń – 19, Aqjaıyq aýdanynyń – 32 eldi mekenine, Oral qalasynyń 4 aýdanyna naqty qaýip bar.
Jaıyq ózeniniń sýy qarqyndy kóterilip jatyr, qaýipti deńgeıge jetýi jaqyn. Barlyq kúsh-qural qazir ózen boıynda, tasqynnyń aldyn alýǵa jumyldyrylǵan. Oralǵa elimizdiń 7 oblysynan kómek kelip, joǵarydaǵy eldimekenderge bólingen.
«Qazir geodezıster jumys istep jatyr, qalanyń tómen ornalasqan aýdandaryn anyqtap, halyqty kóshirip jatyr», dedi tótenshelikter ókili.
Sáýirdiń 15-i kúni Jaıyq ózeni jaǵalaýynda ornalasqan birneshe eldimekenge evakýasııa jarııalandy. Eń aldymen balalar men analar, qarııalar, múmkindigi shekteýli jandar qaýipti aımaqtan shyǵý, úı janýarlaryn ýaqytsha kóshirý eskertilip jatyr. Oral qalasynyń ákimi Mırjan Satqanov ta: «О́zen jaıylmasyndaǵy eldi mekender men saıajaı úılerin sý basý qaýpi joǵary. Ásirese Oral qalasynyń Kýrenı, Starısa, Komıntern, Samal, Jas natýralıster stansasy, oblystyq aýrýhana aýmaǵynda turatyn halyqqa evakýasııa isteýimiz qajet. О́zińizdiń jáne jaqyn adamdaryńyzdyń ómirin qaýipke tikpeı, shuǵyl túrde aǵaıyn-baýyrlaryńyzǵa, dostaryńyzdyń úıine ornalasyńyz. Ýaqytsha baratyn úı bolmasa, Oral qalasyndaǵy evakýasııalyq ortalyqtardyń birine kelińiz», dep habarlady.
Tasqyn qaýpine baılanysty Oral qalasynda sý basý qaýpi tóngen №27 mekemesinde jazasyn óteýshiler shuǵyl túrde ózge óńirlerge – Aqtóbe, Taraz, Shymkent jáne Qyzylorda qalalaryna kóshirilgen.
Mamandardyń aıtýynsha, Reseı Federasııasynan sýdyń mol kólemi 1-2 kúnde Oral qalasyna jetedi. Qaýipti deńgeı 8,5 metr bolsa, qazirdiń ózinde Jaıyqtyń deńgeıi 8 metrge jýyqtap qaldy. Sý tasqynyna qarsy jumysqa jergilikti atqarýshy organnyń jáne tótenshe jaǵdaı qyzmetiniń barlyq resýrsy tartylǵan. Qazir 350 arnaıy tehnıka, 2000-ǵa jýyq adam tasqynǵa tosqaýyl qoıýǵa jumyldy. Sondaı-aq ózge óńirlerden, oblysymyzdyń aýdandarynan kelgen áskerı qyzmetshiler, tótenshelikter jáne eriktiler bul jumysqa belsene atsalysyp jatyr.
Oral qalasyndaǵy «Batys» óńirlik qolbasshylyǵynyń baspasóz qyzmeti qazir óńirde Qaraǵandy, Qyzylorda, Shymkent qalalarynan kelgen 1000-ǵa jýyq ulandyq sarbaz ben 40-tan astam tehnıka júrgenin habarlady.
Sarbazdar el basyna kún týǵan sátte oılanbastan kómekke umtylyp, erliktiń eren úlgisin kórsetip jatyr. 14 sáýir kúni Oral qalasy manyńdaǵy eldi meken turǵyndaryn evakýasııalaý barysynda 30-ǵa jýyq adam otyrǵan júk kóligi tasqyn sýdyń ortasynda qalyp qoıdy. Sol jerde kezekshilikte turǵan Ulttyq ulan 5517 áskerı bóliminiń qyzmetkeri Máýlen Márlenov jedel qımyldady. О́ziniń júk kóligimen topan sýdyń ortasyna qoıyp ketip, batyp qalǵan kólikti qaýipsiz jerge súırep shyǵardy. Mundaı oqıǵa kóp.
Sáýirdiń 15-inen bastap Jaıyq ózeniniń jaǵalaýynda ornalasqan Aqjaıyq, Bórli, Báıterek, Terekti aýdandarynyń jáne Oral qalasynyń orta bilim berý, kásiptik-tehnıkalyq jáne qosymsha bilim berý uıymdary qashyqtan oqýǵa kóshkenin habarlaǵan edik. Bul bastamaǵa Mahambet atyndaǵy Batys Qazaqstan ýnıversıteti de qosylyp, stýdentterdi eriktiler qataryna qosylýǵa shaqyrdy.
Bul kúnderi Oral qalasynda barlyq kúsh, barlyq nıet tasqyn sýdyń aldyn alýǵa baǵyttalyp jatyr. Oblys ortalyǵyndaǵy ortalyq meshitte jamaǵat topan sýdyń qaıtyp, halyq zardap shekpesin degen nıetpen «Qajet namazyn» oqydy. Namaz aldynda óńirdiń bas ımamy Samat Álibaev jamaǵatty birlikke shaqyryp, tasqynnyń aldyn alýǵa bir kisideı jumylýǵa shaqyrdy.
Batys Qazaqstandaǵy alapat sý tasqynynyń betin qaıtarýǵa elimizdiń 7 oblysynan kómek keldi degenbiz. Osy kúnderi Respýblıkalyq jedel-qutqarý jasaǵynyń qutqarýshylary qala mańyndaǵy saıajaı alaptarynan turǵyndar men úı janýarlaryn táýlik boıy qaýipsiz jerge kóshirip jatyr.
Keshe Almaty oblysynan kelgen 150-den astam tehnıka, onyń ishinde tıeý, ınjenerlik, júk jáne sý tasıtyn tehnıkalary jáne motorly qaıyqtar tıisti jerge jóneltildi. Batys Qazaqstan jáne Aqtóbe oblysynyń TJD qutqarýshylary Terekti aýdany Toqpaı aýylynda jaǵalaýdy nyǵaıtyp jatsa, Qyzylorda oblysynan kelgen tótenshelikter toby Oral qalasyndaǵy Jaıyq ózeniniń jaǵalaýyn kóterip jatyr. Al TJM-nyń 52859 áskerı bólimi sarbazdary osy saǵatta Báıterek aýdanyna qarasty Iаnvarsev eldi mekeninde júr. Aıta keteıik, Reseı aımaǵynan kele jatqan alapat tasqyndy alǵash qarsy alatyn da osylar.
Oblysta jarııalanǵan tótenshe jaǵdaıǵa baılanysty sý tasqynynan zardap shekkenderge arnap 28 naýryz – 15 sáýir aralyǵynda «Aqjaıyq» qorynyń esep shotyna 146.656.993 teńge qarajat túsipti.
О́ńirde sý tasqynynan zardap shekken azamattarǵa jan-jaqty kómek jasalyp jatyr. Jergilikti bıýdjet esebinen 677 otbasyǵa birjolǵy áleýmettik kómek retinde 125 mln teńge qarjy tólengen.
Sáýirdiń 15-i kúni Qazaqstan halqy Assambleıasynyń Shymkent qalasyndaǵy QHA ókilderi men eriktilerinen «Júrekten-júrekke» respýblıkalyq jobasy aıasynda kezekti gýmanıtarlyq kómek kerýeni kelip jetti.
Batys Qazaqstan oblysy
