Tálimi tereń babalarymyzdyń «Bir tal kesseń, on tal ek», «Aǵashty jerdiń yrysy mol» dep beker aıtpaǵany anyq. Máselen, oblys ortalyǵynda osy kóktemde 1 myń aǵash kósheti, al kúzde 5 myń aǵash kósheti otyrǵyzylǵan. Mamyr aıynan bastap 50 myń túp gúl egýdi josparlap otyr. Sondaı-aq qazir shahar tazalyǵyn 800 jumysshysy bar 8 kásiporyn moınyna alyp otyr. Buǵan qosa qala turǵyndary da, eriktiler jáne ár salanyń jetekshi mamandary da belsene qatysyp jatyr. Osy aptanyń ózinde 200 dana aǵash kósheti kóktese, kógaldandyrý jumystaryna 100-den asa adam men 5 birlik tehnıka kúshi jumyldyrylǵan.
«Ekologııalyq aksııa 5 aptaǵa sozylady. Ár aptanyń ózindik taqyryby bar. Búgin aksııa aıasynda 200 túp aǵash otyrǵyzylyp, 22 shaqyrym aryq jelisi qoqystan tazartyldy. 20 sáýir kúni «Taldyqorǵan petroglıfter álemi astanasy», «Tasbaqa tas» atty qaıyrymdylyq etnofestıval, senbilik ótkiziledi. Turǵyndar da qarap qalǵan joq, bári bir atanyń balalaryndaı qalany qoqystan aryltyp jatyr», deıdi deıdi qala ákimi Ernat Bázil.
Onyń aıtýynsha, ár apta saıyn tabıǵatqa basa kóńil bólinip, belgili bir taqyryppen tazalyq is-sharasy ótedi. Máselen, birinshi aptada «Taza ólke» taqyrybynda turǵyndar men mekeme qyzmetkerleri óz aýla-jaıyn tazartqan. Odan keıin «Kıeli meken» aptalyǵy ótken. Onda qala aýmaǵyndaǵy tarıhı-mádenı eskertkishterdiń mańaıyna abattandyryldy. Al «Jasyl aımaq» aptalyǵynda negizinen kóshet egiledi. Jastarǵa arnalǵan «О́negeli urpaq» aptalyǵy kezinde ardagerler men Qarttar úıiniń aýlasyn jınap, kómektesý kózdelgen. Sońǵysy – «Móldir bulaq» aptalyǵy. Bul baǵytta ózen-kólderdiń jaǵasyn retke keltirip, tazartady.
Jol jıekterine aǵash kóshetterin otyrǵyzýǵa qala turǵyndarynan bólek «Belsendi uzaq ómir súrý» ortalyǵynyń ardagerleri men qalalyq salyq basqarmasynyń qyzmetkerleri de atsalysty. Astana jáne Balapanov kóshesine jınalǵan jurt qolyna ketpen-kúregin ustap, aǵash otyrǵyzýǵa kiristi. Aınalany jasyl jelekke oraǵan, jol boıynyń sánin keltirgen aǵashtar ásem beınesimen kóz tartady. Aksııa aıasynda aryq jelilerin tazalaý, aǵash otyrǵyzý, senbilik ótkizý, qarttarǵa járdemdesý, ózen jaǵalaýyn tazartý, aǵashtardy sanıtarlyq kesý jáne de gúl egý jumystary qarastyrylǵan.
«Taldyqorǵandy gúldendirýge zeınetkerler de keldi. Sebebi qalanyń tazalyǵyna bárimiz jaýaptymyz. Dana halqymyz «Atańnan mal qalǵansha, tal qalsyn» dep tekke aıtpaǵan. Biz qalany kórkeıtý jumysyna atsalysyp, bolashaqqa iz qaldyrýymyz kerek. Qalamyzdyń kórkeıgeni bárimizge tıimdi», deıdi zeınetker Aǵaısha Shákenova.
Atalǵan is-shara sheńberinde aýyl-aımaqtar ájeptáýir kúl-qoqystan tazaryp qaldy. Máselen, bir aptada Taldyqorǵannyń ózinen qoqyp jatqan, retsiz shashylǵan 300 tonnadan asa zat shyǵarylǵan. Qala ishindegi birneshe shaqyrymdy quraıtyn aryqtar arshylǵan.
Osy oraıda jumystarynyń qarbalastyǵyna qaramastan Taldyqorǵan qalalyq kópsalaly aýrýhana qyzmetkerleri de qala tazalyǵyna óz úlesin qosty. Olar aýrýhana aýmaǵyn, kúre joldardyń boıyn, aǵash aralaryn las qaldyqtardan tazartyp, jurttyń yqylasyna bólendi.
«Jetisý jerinde sý basý qaýpi joq. El ishi tynysh, sondyqtan búginde tabıǵı apat bolǵan aımaqtarǵa shama-sharqynsha gýmanıtarlyq kómek kórsetip jatyrmyz. Buǵan qosa jıi-jıi tazalyq aksııalary ótip jatyr. Bul – eń aldymen el birligin saqtaı otyryp, týǵan jerimizdi taza ustaýǵa tárbıeleıtin rýhanı kúsh. Dárigerler de jumystyń tyǵyzdyǵyna qaramaı, turǵyndarmen qatar aýla tazalap jatyr», deıdi Kóksý aýdandyq ortalyq aýrýhanasynyń dırektory Jannur Syrymov.
Jergilikti jurt aksııanyń barlyq qatysýshysynyń is-áreketterin úılestirý úshin aýdandyq jáne aýyldyq deńgeıde qoǵamdyq shtabtar qurǵan. Bul jumys Kóksý aýdanynda júıeli júrgizilip jatyr. Ortalyq alańda tazalyq jumystaryna den qoıyp, Memleket basshysynyń aýmaqtardy abattandyrý, kógaldandyrý jóninde bergen tapsyrmasyn talapqa saı atqaryp keledi. Osy aptada myńnan asa aýdan turǵyny belsene qatysqan. 26 birlik arnaıy tehnıka jumyldyrylyp, 150 tekshe metrge jýyq qoqys shyǵarylǵan.
Jetisý oblysy
