Bul is Astana qalasynyń mamandandyrylǵan aýdanaralyq ákimshilik sotynda qaraldy. 4 qańtarda "Maıqaıyńaltyn" AQ Maıqaıyń jerasty kenishiniń aýmaǵynda "KÁAQQ" JShS qyzmetkerleri avtobýs tazartý keńistigine qulap, saldarynan eki adam qaza taýyp, qalǵan ekeýi habar-osharsyz joǵalǵan bolatyn.
QR EHÁQM Eńbek jáne áleýmettik qorǵaý komıteti tóraǵasynyń 4 qańtardaǵy buıryǵymen Eńbek kodeksiniń 188-babynyń 3-tarmaǵyna sáıkes eńbek qyzmetine baılanysty ólimge ákep soqqan jazataıym oqıǵanyń sebepterin tergeý maqsatynda komıssııa quryldy.
Tergeý qorytyndysy boıynsha komıssııa toptyq jazataıym oqıǵany tergeý aktisin jasap, oǵan jumys berýshiniń 100 paıyz kinási bary anyqtaldy.
Alaıda "Maıqaıyńaltyn" AQ jazataıym oqıǵaǵa qatysy joq ekenin aıtty.
Isti qaraý kezinde sot taý-ken massasynyń keńistikke qulaýy saldarynan toptyq jazataıym oqıǵanyń sebepterine mynalardy jatqyzdy:
1. "Maıqaıyńaltyn" AQ jaýapty tulǵalary tarapynan taý-ken jumystarynyń qaýipsiz júrgizilýine óndiristik baqylaýdy tıisinshe júzege asyrmaýy.
2. Taý-ken jáne geologııalyq barlaý jumystaryn júrgizetin qaýipti óndiristik obektiler úshin ónerkásiptik qaýipsizdikti qamtamasyz etý qaǵıdalaryn buza otyryp, bloktardy pysyqtaý kezinde opyrylý prosesin tıisti deńgeıde baqylamaý.
3. Talapkerdiń ken qazbalaryn pysyqtaý kezinde qazba birlikterin (bloktaryn) jetildirýge arnalǵan jobalary bolmaǵan (ázirlenbegen).
Mán-jaı sotta zerttelgen tergeý materıaldarymen, onyń ishinde saraptamalar men kishi komıssııalardyń qorytyndylarymen rastaldy.
Jazataıym oqıǵa jumys ýaqytynda "KÁAQQ" JShS qyzmetkerleriniń eńbek mindetterin oryndaý kezinde bolǵan.
"Maıqaıyńaltyn" AQ jaýapty tulǵalarynyń áreketterinen týyndaǵan jazataıym oqıǵanyń sebepterin negizge ala otyryp, talapkerdiń 100 paıyz kinási bar dep tanyldy. Osyǵan baılanysty sot Eńbek komıteti men TJM О́nerkásiptik qaýipsizdik komıtetine talap qoıýdy qanaǵattandyrýdan bas tartty", - dep jazylǵan basylym málimetinde.
Sheshim zańdy kúshine engen joq.
