Sondaı-aq Sıfrlyq damý, ınnovasııalar jáne aeroǵarysh ónerkásibi mınıstrligi oblystyq ákimdikterdiń suranysyna saı tasqyn sý basqan óńirlerge 48 «Starlink» termınalyn jiberdi. Dálirek aıtqanda, Qostanaı oblysyna – 30, Aqtóbe oblysyna – 3, Batys Qazaqstan oblysyna – 3, Ulytaý oblysyna –1, Atyraý oblysyna – 6, Shyǵys Qazaqstan oblysyna –2, Soltústik Qazaqstan oblysyna – 3 termınal berildi. Bul aldymen úzdiksiz oqý úderisin qamtamasyz etý úshin sol óńirdegi mektepterge jetkiziledi. Sonymen qatar osy aptada respýblıka kóleminde bir ýaqytta qosylýǵa qosymsha termınal keshenin jiberý josparlanyp otyr.
Qazirgi tańda 447 aýyl mektebi «Starlink» tehnologııasyn qoldanyp, ǵalamtormen qamtyldy. Termınaldy ornatqannan keıin mektepterdegi ınternettiń ortasha jyldamdyǵy 200 Mbıt/s jetedi. Budan basqa uıaly baılanys operatorlary tasqyn shaıǵan aımaqtaǵy abonentterdiń tarıftik josparyna qosymsha resýrstar (40-50 mın, 40-50 SMS jáne 7 kúnge 8-10 Gb) qosty. Mınıstrlik jedel, úzdiksiz baılanysty uıymdastyrý úshin Aqtóbe oblysynyń ákimdigine «Thuraya» (2 dana) spýtnıktik telefonyn paıdalanýǵa berdi.
Al «Astana Hub» sý tasqynyn basqarý boıynsha 30-dan asa ınnovasııalyq sheshimdi jınap, olardy qaraý úshin Tótenshe jaǵdaılar mınıstrligine tapsyrdy.
Amerıkalyq startap «ARC Drones» negizin qalaǵan Álibek Eltaı men Ásel Tursyn elimizdegi sý tasqynyna qarsy kómek kórsetýge avtonomdy drondaryn usyndy. Tehnoparkpen seriktestik aıasynda 3 ushqyshsyz ushatyn apparattar medısınalyq, gýmanıtarlyq jáne basqa da qajetti zattardy shalǵaı óńirlerge jetkizedi.
