Ekologııalyq sharany Ulan aýdany ákimdigi men ShQO Jýrnalıster odaǵy fılıaly uıymdastyrdy.
«Taza Qazaqstan» ekologııalyq aksııasy sheńberinde oblystyń qalalarynda, aýdandary men aýyldarynda abattandyrý, kógaldandyrý, tazalaý jumystary júrgizilip jatyr.
Tarıhı eskertkishterdi qorǵaý kúninde jáne «kıeli meken» aptalyǵynda Qorjynbaı taýynyń bókterindegi Aqbaýyr arheologııalyq kesheni men Besterek ólketaný mýzeıiniń mańy tazartyldy, kóshet egildi.
«Búgin tarıhı mańyzy zor «Aqbaýyr» kesheniniń aýmaǵy tazalandy. Ekologııalyq aksııa aıasynda keshen aýmaǵyna 50 túp kóshet, Besterek aýylyndaǵy mýzeı aýmaǵyna 30 túp kóshet otyrǵyzyldy. Sondaı-aq, qatysýshylarǵa arnap Ulan aýdanynyń mádenıet qyzmetkerleriniń daıyndaǵan merekelik konserti qoıylyp, as berildi», deıdi Ulan aýdany ishki saıasat bóliminiń basshysy Qanat Oralbek.
Aıtqandaı, bul iske jýrnalıster qaýymy da belsene qatysqan. Olar keshenniń kireberisinen tórge qaraı qorshaýdy jaǵalaı Batys Altaıdyń jasyl shyrshasyn ekti.
«Nege ekenin qaıdam, osyndaı kıeli jerler jıi lastanady. Týrısterdiń deni demalý mádenıetin bilmeı me, shashyp ketedi. Sondyqtan, osyndaı sharalardy jıi ári keń kólemde uıymdastyrsa, bireý bolmasa, bireýi oılanar edi. Qalamyz da, dalamyz da lastanbas edi. Búgin biz ShQO Jýrnalıster odaǵy fılıalynyń shaqyrtýymen senbilikke keldik. Kóshet otyrǵyzdyq, aınalany tazaladyq», deıdi oblystyq «Meniń ólkem» gazetiniń tilshisi Valentına Svırdenko.
Ulan aýdanynda uıymdastyrylǵan «Kıeli meken» aksııasy óte joǵary deńgeıde ótti.
