Foto: yandex.ru
Densaýlyq saqtaý mınıstrliginiń Medısınalyq jáne farmasevtıkalyq baqylaý komıteti zamanaýı medısınada dáleldi jáne dástúrli emdeý ádisteri bar ekenin túsindirdi. Dástúrli medısına - ǵasyrlar boıy ata-babalarymyz qoldanǵan tabıǵı shóp-dári arqyly emdeý ádisi, bul baǵyttyń naqty áseri ǵalymdarmen de dáleldengen.
«Emdik jáne dástúrli medısına qyzmetterin kórsetý úshin azamattarda «dástúrli medısına: gomeopatııa, gırýdoterapııa, manýaldy terapııa, refleksologııa, shóptermen emdeý jáne tabıǵı ónimdermen emdeý» kishi túrine lısenzııa, sondaı-aq joǵary medısınalyq bilim jáne «Dástúrli terapııa (refleksoterapııa, manýaldy terapııa, sý-djok terapııasy, gomeopatııa, gırýdoterapııa, shóptermen emdeý)» mamandyǵy boıynsha sertıfıkat talap etiledi. Bul rette komıtet kóripkel, baqsy, astrologtardyń qyzmetin retteýmen aınalyspaıdy», dep málimdedi vedomstvo ókilderi.
Ádilet mınıstrligi de mundaı qyzmet vedomostvo quziretine kirmeıtinin aıtty. Demek, eldegi kóripkel-baqsylardyń qyzmeti zańmen rettelmeıtin bolyp shyqty.
Al memlekettik qyzmetshiler jumys barysyndaǵy jáne odan tys máselelerin sheshý úshin kóripkeldermen baılanysa ala ma? Bul saýalǵa Memlekettik qyzmet isteri agenttigi jaýap berdi.
«Qazaqstan Respýblıkasynyń memlekettik qyzmeti týraly» Zańda memlekettik qyzmetshilerdiń jeke ómirine qatysty shekteýler joq. Alaıda memlekettik qyzmetshiler jumystan tys ýaqytta qyzmettik etıka normalaryn saqtaý kerek. Jalpy qabyldanǵan moraldyq-etıkalyq normalar sheneýnikterge óziniń qyzmettik jaǵdaıyn paıdalanbaýǵa, qoǵamdyq moralǵa qol suǵýmen baılanysty jat minez-qulyq kórsetý jaǵdaılarynyń aldyn alýǵa múmkindik beredi», delingen habarlamada.
Sondaı-aq agenttik jumys barysynda memlekettik qyzmetkerlerdiń kóripkel, baqsylarmen baılanysý deregi resmı tirkelmegenin, bul áreketi úshin áli eshkim jazalanbaǵanyn tilge tıek etti.
