Jastar resýrstyq ortalyǵynyń dırektory Aıjan Musataeva «Jasyl aımaq» aptalyǵynyń birinshi kúninde jastar men mekemeler ujymdary ǵana emes, zeınet jasyndaǵy ardagerler de senbilikke kelgenin aıtty. Kýrchatovtyqtar kóshelerdi, skverlerdi, saıabaqtardy jáne basqa da qoǵamdyq oryndardy abattandyrý barysynda aǵash túpterin ákteý jumystaryn júrgizdi. 42 uıym men kásiporyn ókilderi tehnıkanyń kúshimen qalany 40 tonna qoqystan tazartty.
«Jastarymyz óz eliniń patrıottary retinde osy aksııaǵa belsendi qatysyp jatyr. Apta saıyn ótetin senbilikterge qatysý arqyly qalamyzdyń ǵana emes, búkil elimizdiń ekologııasyn jaqsartýǵa atsalysa alatynymyzǵa senimdimin», deıdi Aıjan Musataeva.
Aksııa bastalǵaly tabıǵat janashyrlary tarıhı-mádenı eskertkishterdiń aýmaǵyn tazartty. Bir kúnde 1000-nan astam belsendi turǵyndar Kýrchatov qalasyn tazalaýǵa qatysty.
«Qalamyzdaǵy senbilik sharalaryna jastardyń belsendi qatysyp jatqany qýantady. Árıne, biz, ardagerler de, qalyspaýǵa tyrysamyz. О́ıtkeni qorshaǵan ortaǵa qamqorlyq — bul bizdiń bolashaq ómirimizge qamqorlyq. Kúsh-jigerimizdi biriktire otyryp, qorshaǵan ortany qoqystan tazartyp, kógaldandyryp, Jer sharyn taza ári jasyl planetaǵa aınaldyrýǵa atsalysamyz», deıdi ardagerler keńesiniń tóraǵasy Ǵalymjan Jumadilov.
