Foto: satbayev.university
Halyqaralyq pándik reıtıng boıynsha barlyǵy 149 elden bes myńǵa jýyq álemdik ýnıversıtettiń kórsetkishteri taldandy. Halyqaralyq joǵary oqý oryndarynda oqytylatyn pánderdiń sapasyn brıtandyq «Quacquarelli Symonds» agenttigi baǵalady. Onyń nátıjesi boıynsha Eýrazııa ulttyq ýnıversıteti joǵary kórsetkishterdi baǵyndyrýmen qatar, reıtıngtegi ókildigin 20 pánge deıin keńeıtti. Elimizdiń jetekshi ýnıversıteti 17 pándik jáne 3 salalyq reıtıngte usynylǵan. Solardyń ishinde «Qonaqjaılylyq jáne demalysty uıymdastyrý» baǵytynda rekordtyq nátıje kórsetip, 2253 ýnıversıtet arasynda úzdik 50 joǵary oqý ornynyń qatarynan kóringen. Aıta keteıik, bul – Ortalyq Azııa boıynsha eń joǵary kórsetkish. Sondaı-aq oqý ordasy 5 pán boıynsha alǵashqy júzdikke endi. Olar: «Aǵylshyn tili men ádebıeti», «Zamanaýı tilder», «Lıngvıstıka», «О́ner jáne dızaın», «Qonaqjaılylyq jáne demalysty uıymdastyrý» pánderi.
«Otandyq joǵary oqý oryndarynyń pándik reıtıngterdegi oryndary sanynyń qyryq birden elý jetige deıin jáne salalyq reıtıngterdegi toǵyzdan onǵa deıin ósýi – aıtarlyqtaı úlken nátıje. Jańa tizimniń birinshi júzdiginde birqatar pánder boıynsha ókildiktiń keńeıýi, L.N.Gýmılev atyndaǵy Eýrazııa ulttyq ýnıversıtetiniń úzdik elý pán boıynsha kósh bastaýy, Muhtar Áýezov atyndaǵy Ońtústik Qazaqstan ýnıversıtetiniń jarııalanǵan reıtıngterdegi debıýti jáne basqa da birqatar mańyzdy jetistik – basshylardyń, professor-oqytýshylar quramy men qyzmetkerlerdiń kásibıligin kórsetedi», dedi QS óńirlik dırektory Sergeı Krıstolıýbov.
Pándik reıtıngte ýnıversıtettiń akademııalyq sarapshylar men jumys berýshiler arasyndaǵy bedeli, akademııalyq zertteýlerdiń dáıeksózderi, halyqaralyq zertteý jelisiniń ındeksi boıynsha baǵalanady. Kóptegen sala boıynsha Eýrazııa ulttyq ýnıversıteti birneshe satyǵa joǵary kóterilip, ótken jylǵy nátıjelerin jańartty. Atap aıtsaq, «Til bilimi» boıynsha 94-ten 69-orynǵa, «Zamanaýı tilder» – 88-den 84-orynǵa, «Tehnıka jáne tehnologııa» salasy boıynsha 200 orynǵa alǵa ilgerilegen. Sondaı-aq ótken jylmen salystyrǵanda «Arheologııa», «О́ner jáne dızaın», «Aǵylshyn tili men ádebıeti», «Tarıh», «Qazirgi tilder», «Ekonomıka jáne ekonometrıka», «Injenerııa jáne tehnologııa» pánderi boıynsha kórsetkishter edáýir joǵarylaǵan. Alǵash ret álemdik reıtıngke «Bilim», «Áleýmettaný» jáne «Elektrli jáne elektrondyq ınjenerııa» pánderi kirdi.
Aıta keteıik, Eýrazııa ulttyq ýnıversıteti 2017 jyldan bastap QS pándik reıtıngte baq synap keledi. Ár jyl saıyn úzdik nátıjeler kórsetip júrgen oqý ordasy elimizdegi ýnıversıtetter arasynda QS pándik reıtıngisiniń úzdik júzdiginde kósh bastap tur.
