Bir ǵasyrdan astam ýaqyttan beri toılanyp kele jatqan meıramnyń tarıhı máni zor. Sebebi 1920 jyly 23 sáýirde Túrkııa Uly Ulttyq Májilisi quryldy. Sodan bastap Túrkııa Respýblıkasynyń negizin qalaýshy Mustafa Kemal Atatúrik bul kúndi «Ulttyq egemendik jáne balalar kúni» dep jarııalap, balalarǵa tartý etken eken. Osydan keıin jyl saıyn Túrkııada 23 sáýir «Ulttyq egemendik jáne balalar kúni» retinde atalyp, eldiń túkpir-túkpirinde balalarǵa arnalǵan úlken is-sharalar uıymdastyrylady.
Elimizdegi Túrkııa elshiligi de óz elderindegi menshikti meıramdy umyt qaldyrmaý maqsatynda astanalyq balalarǵa kóńildi mereke uıymdastyrdy. Ertegi keıipkerlerimen bı bılep, sıqyrǵa toly oıynǵa qatysqan baldyrǵandardyń qýanyshynda shek joq. Sonymen birge mýltfılm qaharmandarynyń beınesin somdaǵan anımatorlardyń súıemeldeýimen jáne túrli boıaý jumystarymen tanysyp, ózderi de bir sát ǵajaıyp áleminiń keıipkerine endi. Olardyń qatarynda Qazaqstanda turatyn túrik balalar ǵana emes, elordadaǵy qıyn ómirlik jaǵdaıǵa túsken otbasynyń balalary men balalar úıiniń 20 tárbıelenýshisi de shaqyrtyldy. Merekege oraı Astanadaǵy Túrkııa Respýblıkasy elshiliginiń uıymdastyrýymen merekelik baǵdarlama uıymdastyryldy.
Eń qyzyǵy, jyldaǵy dástúr boıynsha bıyl da Túrkııa Respýblıkasynyń elshisi Mustafa Kapýdjý elshilikke kelgen kishkentaı qonaqtarǵa kreslosyn tabystady. Merekelik is-shara sońy qonaqtarǵa arnalǵan as mázirimen jalǵasyp, merekelik sharalarǵa qatysýshy balalarǵa túrli syılyqtar tabys etýmen aıaqtaldy.
