Kúni búginge deıin sý basqan óńirlerge dostyq úılerinen 700 mln teńgeden astam qarajatqa kómek jiberilipti. Ol úshin 12 myńǵa jýyq volonter qyzmet kórsetip jatyr.
– Qazaqstan halqy Assambleıasynan «Júrekten – júrekke!» aksııasynyń aıasynda qazirgi kezde 1 100 tonna gýmanıtarlyq kómek jiberildi. Somasy 750 mln-nan asty. Tek gýmanıtarlyq kómek emes, óz tehnıkasy, ekskavatory bar kásipkerler kómek berip jatyr. Sý basqan óńirlerde kúndelikti 1 000-2 000 adamǵa – tótenshe jaǵdaı qyzmetkerleri, volonterlerge ystyq tamaq beremiz, – dedi Qazaqstan halqy Assambleıasynyń múshesi, «Dýstlık» ózbek birlestigi tóraǵasynyń orynbasary Hasan Sháripov.
Qazir elordada 9 gýmanıtarlyq kómek qabyldaý pýnkti jumys istep tur. Onda 30-ǵa jýyq eriktiler uıymy bar. Kún saıyn 200-den astam erikti qajetti zattardy suryptaıdy. Aıta keterligi, eriktiler qarjylyq kómekti qabyldamaıdy. Tek qajetti zattardyń tizimin jasaqtap, ákelýge nıetti jandarǵa usynady.
«Júrekten – júrekke!» aksııasy barysynda Astanadan Aqmola, Qaraǵandy jáne Soltústik Qazaqstan oblystaryna gýmanıtarlyq kómek jóneltildi. Sondaı-aq QHA aıasynda respýblıkalyq jáne óńirlik shtabtar qurylǵan. Volonterlik ortalyqtar da uıymdastyryldy. Qoǵam janashyrlary apatty aýdandarda, aýyldy mekenderde halyqqa kómektesip, dári-dármekterin alyp baryp, qıyn-qystaý jaǵdaıdaǵy aǵaıynnyń alǵysyn alyp júr.
