Ol aldymen Atyraý qalasyndaǵy sý tasqynynyń boljamdy ekinshi tolqynyna daıyndyq jumystarymen tanysty. Qazir batys óńirde Reseı Federasııasynyń Irıklın sý qoımasynan sýdyń kelýine baılanysty, sondaı-aq Jaıyq ózenine quıylar saǵadaǵy iri tasqyn men sý deńgeıiniń kóterilýi saldarynan jaǵdaı kúrdeli kúıinde qalyp otyr.
Batys Qazaqstan oblysyndaǵy iri sý tasqynynan keıin aǵyn sý ózen arnasymen Atyraý oblysyna qaraı jyljyp, Kaspıı teńizine quıady. Sońǵy táýlikte BQO aýmaǵynan keletin sýdyń esebinen Atyraý qalasynda sý deńgeıi 6 sm-ge kóterildi.
Úkimet basshysy Oljas Bektenov Atyraý oblysyna sý tasqyny jaǵdaıy turaqtanǵan óńirlerden áskerı qyzmetshiler men tehnıkany jedel jetkizip, kúshterdi arttyrýdy tapsyrdy.
Atyraý oblysynda sý tasqynynyń aldyn alýǵa baılanysty daıyndyq jumystarynyń 92 paıyzy oryndalǵan. Jumysty tıimdi júrgizý úshin qala 111 sektorǵa bólingen. Uzyndyǵy 482 shaqyrym qorǵanys bógeti salyndy. Bóget salý aıaqtalǵan ýchaskeler tehnıkalyq qadaǵalaý arqyly tekserildi. Bul jumystarǵa TJM, IIM, Qorǵanys mınıstrligi, Ulttyq ulannyń 6 myńǵa jýyq áskerı qyzmetshisi, ákimdik qyzmetkerleri, 2 myńǵa jýyq tehnıka jumyldyrylǵan. О́tken senbide jaǵalaýdy nyǵaıtý senbiligine 9 myńǵa jýyq erikti qatysty.
Jaıyqtan Kaspıı teńizine sý ótkizý qabiletin arttyrý úshin ózen túbin tereńdetý júrip jatyr. Sý jolyn tazartý, tereńdetý jáne keńeıtý maqsatynda arnaıy tehnıkalyq flottyq kemeler, gıdravlıkalyq ekskavatorlar tartylǵan.
О́ńirdegi sýarý-sýlandyrý júıesinde sý tasqynyna qarsy jumystar qolǵa alynǵan. Atyraý oblysyndaǵy 15 kanaldyń 14-i Jaıyq ózeni boıynda ornalasqan. Sokolok, Naryn, Qaraózek, Baqsaı kanalymen tasqyn sýdyń ózdigimen aǵýyna múmkindik bar. Osyǵan baılanysty sýdy burý úshin jer bederin paıdalaný maqsatynda arnalar tazartylyp, kanaldyń jıegi buzylady. Mysaly, NCOC kompanııasy qoldanystaǵy qurylystardy bólshektep, uzyndyǵy 24 km bolatyn Sokolok qosymsha aınalma arnasyn salý úshin jerdi qazý jumystaryn júrgiip jatyr. Jalpy alǵanda, sý burý arnalary tasqyn sýdy sekýndyna 139,9 tekshe metr kólemde aǵyzý múmkindigine ıe. Barlyq sý qabyldaǵyshta sorǵy stansalarynyń qyzmetkerleri táýlik boıy kezekshilik atqarady.
Degenmen, Inder aýdanynda qaýipti aýmaqqa Jarsýat jáne Qurylys eldi mekenderi kiredi. Bul aýmaqta 10,5 shaqyrym bóget ornalasqan. Sondaı-aq sý basý qaýpi bar Inderbor, Eltaı, Esbol, Kóktoǵaı, Bódene, О́rlik jáne Yntymaq aýyldarynda bógetter kóterilip jatyr. Jaǵalaýdy nyǵaıtý jumystary Inder, Mahambet, Isataı jáne Qurmanǵazy aýdandarynda jalǵasty.
Al Jylyoı aýdanynda tótenshe jaǵdaı zardaptaryn joıý, elektr jáne gazben jabdyqtaýdy qalpyna keltirý jalǵasyp jatyr. Qazir 201 úıde gaz berý qalpyna keltirildi, 41 úıde dezınfeksııalyq jumystar aıaqtaldy. Zardap shekken turǵyndarǵa baspanany ýaqytsha jalǵa alý úshin jáne basqa maqsat úshin 100 AEK mólsherinde qarjylyq kómek kórsetilip, 3 271 otbasy tólem aldy. Zalaldy baǵalaý jáne óteý jónindegi komıssııa jumysyn jalǵastyryp jatyr.
