Respýblıkalyq volonterler shtabynyń alańynda jastar uıymdarynyń jetekshileri bas qosty. Jıynda «Amanat»-tyń atqarýshy hatshysy Dáýlet Káribek partııanyń el aýmaǵyndaǵy fılıaldary janynan gýmanıtarlyq kómek qabyldaý pýnktteri ashylyp, belsendi jumys istep jatqanyn atap ótti.
– Memleket basshysy Q.Toqaev ár azamattyń shynaıy otanshyldyǵy naqty is júzinde baıqalyp jatqanyn aıtqan edi. Prezıdenttiń úndeýimen, elimizdiń túkpir-túkpirindegi volonterler sý basqan qalalar men aýyldarǵa attandy. О́ıtkeni eriktilerde ózgeniń qaıǵysy degen uǵym joq. Olar gýmanıtarlyq kómek jetkizip, jaǵalaýlardy nyǵaıtyp, bóget turǵyzyp, qutqarýshylarǵa as-aýqat uıymdastyryp jatyr. Búginde volonterler qozǵalysy qýatty qoǵamdyq kúshke aınaldy. Bir aıǵa jeter-jetpes ýaqytta 4 myń tonnaǵa jýyq azyq-túlik, kıim-keshek, gıgıenalyq kerek-jaraqtar, qurylys materıaldary jáne ózge de qajetti zattar jınaldy. Al Atyraýda partııanyń bastamasymen uzyndyǵy 22 shaqyrymdy quraıtyn bóget qurylysy aıaqtalyp keledi. Oǵan 1,3 myń jumysshy, 120 tehnıka jumyldyryldy. Bógetti 6 metrge deıin bıiktetý jumysy bastaldy, – dedi ol.
7 sáýirde Memlekettik keńesshi Erlan Qarınniń bastamasymen sý tasqynyna qarsy kúres jumysy aıasynda Respýblıkalyq volonterler shtaby qurylǵan edi. Oǵan elimizdegi iri respýblıkalyq jastar uıymdary men qoǵamdyq qorlar qosyldy. Bul jumysty «Amanat» partııasynyń «Jastar rýhy» jastar qanaty úılestirip jatyr.
– Uıymdardyń 50 myńǵa jýyq múshesi men volonteri zardap shekken turǵyndarǵa kómek qolyn sozyp otyr. Qutqarýshylarmen teń dárejede kómek kórsetip, alǵy shepte júrgen jastar sany kún sanap artyp keledi. Jergilikti organdar men volonterler birlese jumys isteıdi. Basty mindet – zardap shekken barlyq adamǵa barynsha jedel kómek kórsetý, – dedi «Jastar rýhy» jastar qanatynyń tóraǵasy Aqerke Iskanderova.
О́z kezeginde zańger Aqerke Kúnǵazyqyzy zardap shekken adamdardyń joǵalǵan qujattaryn rásimdeýge jáne olardyń ótemaqy alý úshin ótinish berýine kómek kórsetýdi usyndy. Aıta keteıik, dál osy maqsatta partııanyń «Quqyqtyq kómek» jobasy jalǵasyp jatyr. «Amanat»-tyń óńirlik qoǵamdyq qabyldaý bólmeleri Soltústik Qazaqstan jáne Qostanaı oblystaryndaǵy evakýasııalaý pýnktterinde 10 ret kóshpeli qabyldaý ótkizdi. Igi is aıasynda 1 160 adam konsýltatıvtik-quqyqtyq kómek aldy.
Osy oraıda «Qazaqstan Jastar kongresiniń» atqarýshy dırektory Baqdáýlet Jandildaev tótenshe jaǵdaı kezindegi volonterler men jergilikti atqarýshy organdardyń ózara is-qımyl algorıtmin ázirleý týraly bastama kóterdi. Al Qazaqstan stýdentteri alıansynyń tóraǵasy Ulan Naýken stýdenttik qoǵamdastyq Atyraý qalasynyń mańyndaǵy jaǵalaýdy nyǵaıtý jumysyna belsendi atsalysyp jatqanyn málim etti. Belsendi tabıǵı apat aıaqtalǵannan keıin volonterlerdi qum salynǵan qaptardan turǵyzylǵan ýaqytsha bógetterdi alyp tastaý jumysyna da jumyldyrý qajet.
Basqosýǵa «Medısına jastarynyń» tóraǵasy Abylaıhan Ábdirash, «Assambleıa jastarynyń» tóraǵasy Tımýr Jumyrbaev, Ulttyq volonterlik jeli basshysynyń orynbasary Aıbek Dosymbetov, «Dauletten qory» qaıyrymdylyq qorynyń dırektory Jasulan Qýandyq, «Aýyl» HDPP «Aýyl jastary» jastar qanatynyń tóraǵasy Dáýren Rahymbek, QRKF janyndaǵy «Keleshek» respýblıkalyq jastar keńesiniń tóraǵasy Aıan Sálimgereev, «Biz Birgemiz» qorynyń tóraǵasy Perızat Qaırat qatysty.
