Biregeı lentaly ormandy qalpyna keltirýge kúsh salý úshin Semeı qalasy mańyndaǵy Borodýlıha aýdanyna myńnan asa adam attandy. Búginde Abaı aýdanynyń turǵyndary «aǵash otyrǵyzý – árbir adamnyń paryzy» dep sanaıdy. О́ıtkeni bul óńir ejelden jel men qumnan qorǵaıtyn qaraǵaıly ormannan turady.
«Taza Qazaqstan» ekologııalyq aksııasy «Jasyl aımaq» aptalyǵy Borodýlıha aýdanynda bastaldy. Osylaısha, «Semeı ormany» aýmaǵynda «Semeı ormany – jasyl aımaq» atty aǵash otyrǵyzý boıynsha keń aýqymdy aksııa ótti. Aldaǵy ýaqytta da aǵash otyrǵyzý aksııalary turaqty túrde ótkizilmek.
Is-sharaǵa oblys ákimi Nurlan Uranhaev, oblystyq jáne aýdandyq máslıhat depýtattary, ardagerler keńesiniń músheleri, belsendi jastar, stýdenttik uıymdar, eńbek uıymdary, Semeı qalasy men Borodýlıha aýdanynyń mekemelerinen myńnan asa adam qatysty.
«Búgin tutas el kóleminde keń qoldaýǵa ıe bolǵan «Taza Qazaqstan» – ekologııalyq aksııasy aıasynda oblysymyzda erekshe mańyzy bar is-shara ótip jatyr. Memleket basshysynyń tikeleı bastamasymen júzege asqan bul aksııanyń arqasynda Otanymyzdyń ár oblysy, qalasy men aýyly abattanyp, kóshetter otyrǵyzylyp, óńirimiz jańa keıipke enip keledi. Bul – «Atadan mal qalǵansha, tal qalsyn» degen ıgi dástúrdiń jalǵasy», dedi oblys ákimi N.Uranhaev.
Naýqannyń negizgi maqsaty kóshet otyrǵyzý arqyly ekologııamyzdy jaqsartyp, qaraǵaıly ormanymyzdy jedel qalpyna keltirýge baǵyttalǵan. Máselen, «Jasyl aımaq» aptalyǵynyń basynda «Taza Qazaqstan» aksııasy aıasynda Semeı qalasy men Borodýlıha aýdanynyń júzdegen turǵyny jańa kóshetterge ómir syılaý úshin «Semeı ormany» memlekettik orman sharýashylyǵy zaýytynyń qyzmetkerleri daıyndaǵan ýchaskelerge kelip, jumyla iske kirisip ketti. Jappaı aksııaǵa barlyǵy 30-dan astam uıym qatysqan. Onyń ishinde Shákárim atyndaǵy ýnıversıtettiń «Jasyl el» bólimsheleriniń jastary alǵash bolyp ún qosty.
«Búgin jyldaǵy dástúrli is-sharany ótkizýge atsalysyp jatyrmyz. Bul – bizdiń ýnıversıtettiń mıssııalarynyń biri. Sondyqtan GLPR qyzmetkerlerimen birge qoǵamǵa qyzmet etýge daıynbyz. Sonymen qatar biz dóńgelek ústel ótkizip, onda tek qorshaǵan ortany qorǵaý ǵana emes, orman órtterimen kúresý máseleleri de kóterildi. «Taza Qazaqstan» aksııasy aıasynda 50 oqýshymyz eki aıdyń kelesi aptalarynda kógaldandyrýǵa qatysyp jatyr», dedi Shákárim ýnıversıtetiniń rektory Dýman Orynbekov.
Aksııa aıasynda Voskresenovka aýlynyń mańyndaǵy orman alqabyndaǵy 5 gektar aýmaqta 23 myńnan astam qaraǵaı kósheti otyrǵyzyldy. Aıta keteıik, onyń ishinde ormandy alqap – 87 773 ga bolsa, sý aıdyndary 14 301 gektardy quraıdy.
«Taza Qazaqstan» ekologııalyq aksııasy bastalǵaly «Semeı ormany» qoryǵynyń aýmaǵyna 70 myńnan astam kóshet otyrǵyzyldy.
