Foto: senate.parlam.kz
Aıta ketsek, elimizdiń birqatar óńirinde sý tasqyny saldarynan qalyptasqan kúrdeli jaǵdaıǵa baılanysty 700-den astam sessııa qatysýshylary óz óńirlerinen beınebaılanysqa qosyldy. Senat Tóraǵasy M.Áshimbaev bastaǵan bir top depýtattar, «Bir el - bir múdde depýtattyq tobynyń músheleri Parlament qabyrǵasynan sessııa jumysyna qatysty.
«Alqaly jıynnyń kún tártibi árıne búgingi tańda tabıǵattyń tosyn mineziniń saldarynan kelgen zardaptyń ornyn toltyrý jáne qıyndyqqa ushyraǵan otandastarymyzǵa qol ushyn berýdegi Qazaqstan Halqy Assambleıasynyń róline arnaldy desek bolady. Memleket basshysy sý tasqyny kezinde Assambleıanyń atqarǵan aýqymdy ári úılesimdi jumysyna erekshe toqtaldy.
Zardap shekkenderge jan-jaqty qoldaý kórsetý boıynsha jedel túrde QHA respýblıkalyq jáne óńirlik shtabtary qurylǵanyn atap ótti», dep jazdy depýtat.
Depýtattyń sózinshe, shyn máninde de atqarylǵan tirlik az emes. Búkil eldi qamtyǵan «Júrekten júrekke» aýqymdy aksııasy aıasynda apat aımaqtaryna jalpy somasy 770 mıllıon teńgeden astam 1500 tonnadan astam azyq-túlik pen birinshi kezektegi qajetti taýarlar jiberildi.
«Oǵan etnomádenı birlestikterdiń 12 myńnan astam eriktileri qatysty. Memleket basshysy atap ótkendeı Assambleıa óziniń ult birligi men yntymaǵy qundylyqtarynyń tıimdi jolbasshysy ekenin is júzinde taǵy da kórsetti», dedi senator.
Álisher Satvaldıev óz pikirinde Assambleıa Tóraǵasy toqtalǵan asa mańyzdy baǵyttyń biri – QHA jumysyn jańa ulttyq ıdeologııa Doktrınasymen úılestirý ekenin atap ótken.
Prezıdent ıdeologııalyq reforma máselesinde: «Qazaqstanda buryn-sońdy mundaı aýqymdy reforma jasalmaǵan. Biraq buǵan toqmeıilsip otyrýǵa bolmaıdy, reformany sapaly júzege asyra berýimiz kerek. Elimiz qarqyndy damýy úshin ondaǵan jyl boıy qordalaǵan kóptegen máseleni sheshýimiz qajet. Biz kúsh-jigerimizdi biriktirý arqyly ǵana bolashaq jetistikterdiń berik tuǵyryn qalap, saıasatta, ekonomıkada, mádenıette jáne áleýmettik salada túbegeıli ózgerister jasaı alamyz. Dál sol sebepti Assambleıanyń búgingi sessııasy «Birlik. Jasampazdyq. О́rleý» dep ataldy», dep atap ótti.
«Qoǵamymyzdaǵy aýyzbirshilik pen berekeli yntymaǵymyzǵa syzat túsirgisi keletin teris pıǵyldylar men áleýmettik jelilerde alaýyzdyq týǵyzýǵa tyrysatyndardyń qıturqy áreketine aldanbaýǵa shaqyrdy.
Sonymen qatar qarǵyn sý zardabynan shyǵynǵa ushyraǵandardyń barlyq shyǵyny tolyqtaı óteletinin, bul úshin esh qandaı únemdeý bolmaıtynyn atap ótti. Úkimetke memlekettik rezervtegi qarjyny jumsaýǵa ruqsat bergenin málimdedi», dep túıindedi depýtat.
