Prezıdent Aleksandrǵa qoǵamdaǵy birlikti, kelisimdi saqtap, volonterlik qyzmetti damytýǵa qosqan úlesi men belsendi azamattyq ustanymy úshin Alǵys jarııalady.
– Memleket basshysynyń alǵysy – barshamyzǵa aıtylǵan alǵys. Bul – ortaq jumystyń nátıjesi. Alǵyshatpen birge Barys belgishesin ıelený bárine birdeı buıyra bermeıtini ras. Úlken marapatty eńbekpen aınalysatyn barlyq QHA eriktilerine aıtylǵan alǵys retinde qabyldadym. Olar búginde kóptegen áleýmettik jobaǵa belsendi atsalysyp júr. Máselen, búginde «Júrekten – júrekke» aksııasyna ártúrli jastaǵy adamdardan turatyn oblys Assambleıasynyń 12 myńnan astam eriktisi jınaldy. Biz bul baǵyttaǵy jumystardy jalǵastyramyz. Aldaǵy ýaqytta sý tasqynynan keıin jaǵdaıy kúrdelengen qurylystardy, múlikti qalpyna keltirip, turǵyndarǵa úılerine oralýǵa kómektesý kerek. Bes aıda barlyǵyna úlgerý mindeti tur. Qysqa merzimde maqsatqa jetý jolynda bizge birigý kerek, – deıdi Aleksandr Ýrmashov.
Prezıdenttiń qatysýymen ótken QHA sessııasy Aleksandr Ýrmashovtyń birinshi sapary emes. Jas belsendi «Assambleıa jastary» uıymynyń jyl saıyn ótetin sessııalaryna turaqty qatysyp, aımaq jastarynyń abyroıyn asqaqtatyp júr.
Prezıdent Assambleıanyń volonterlik qyzmeti, «Júrekten – júrekke», «Qaıyrymdylyq kerýeni» sekildi aksııalaryn atap ótip, oǵan Qaraǵandy oblysynyń QHA ókildigi belsendi qatysatynyna erekshe toqtaldy. Sondaı-aq Aleksandr sekildi ustanymyna berik azamattardyń jumysyna rıza ekenin jetkizdi.
Aleksandrdyń aıtýynsha, Memleket basshysynyń alǵysy sekildi mártebeli marapattardyń barlyǵy oǵan etnosaralyq qatynastardy, qoǵamdaǵy birlikti saqtaýǵa jáne QHA jastar qozǵalysyn damytýǵa qosqan úlesi úshin berildi. Belsendi qaraǵandylyq buǵan deıingi pikirtalas formatyndaǵy Assambleıa sessııalarynda da qoǵamdaǵy birlikti saqtaýda óz pikirin aıtýmen kópten kózge túsken.
– Birneshe jyl buryn sessııany ótkizý formaty ózgerdi. Endi ol belgili baǵyttarǵa jaýapty ortalyq memlekettik organdardyń qatysýymen paneldik pikirtalas formatynda óte bastady. Bıyl da sý tasqynyna baılanysty sessııa formaty ózgertilip, onlaın júıege aýystyryldy. Q.Toqaevtyń sý tasqynynan zardap shekkenderdiń ótemaqy alatyny týraly sózderi erekshe este qaldy. Olardy qıyn jaǵdaıda qaldyrmaý óte mańyzdy. Men Soltústik Qazaqstan, Aqmola oblystary, Arqalyq qalasynda bolyp, zardap shekkendermen sóılestim, máseleniń asa aýqymdy ekenin baǵamdadym. Bul týraly baıandamamda atap óttim. Ol jaqta gýmanıtarlyq kómek qabyldap, evabeketterge bardyq. Eriktilerdiń birigip jumys isteıtinin, otandastarymyzdyń qajetti kómekti jınap, soltústikke jiberip jatqanyn kórdim. El múddesi úshin atqarylyp jatqan jumystardyń beker emes ekenine kózim jetti, – deıdi A.Ýrmashov.
Alǵys arqalaǵan Aleksandr basshylyq etetin óńirdegi «Assambleıa jastary» 2022 jyldyń qańtarynda qurylǵan. Búginde 6 negizgi baǵytta jumys atqarady. Jastardy áleýmettik jaǵynan qoldaý maqsatynda «Social Assembly» jobasy qolǵa alynǵan. Munda jastardy jumysqa ornalastyrýǵa, bilim alýlaryna jaǵdaı jasaýǵa basymdyq beriledi. Ekinshi baǵyt – «Birlik tili». Bul baǵytta Assambleıa quramyndaǵy jastarǵa memlekettik tildi úıretedi. Iаǵnı jastarǵa qazaq tilin bilý mindettelgen. Prezıdent Atyraýda ótken Ulttyq quryltaıdyń úshinshi otyrysynda tarıhı jádigerlerdiń saqtalýyna aıryqsha toqtalǵan edi. Q.Toqaevtyń bastamasyn qoldap, Assambleıa jastary «El murasy» degen baǵytta jumystaryn bastap ketti. Jastar Arqadaǵy tarıhı oryndar men jádigerlerdiń saqtalýyna óz úlesterin qosady. «Taza orta» baǵytyndaǵy eriktiler óńirdegi ekologııany jaqsartý jáne qorshaǵan ortany saqtaý úshin eńbek etedi. Jas býynnyń patrıottyq rýhyn kóterý maqsatynda «Qasıetti paryz» jobasy júzege asyrylyp jatyr. Jastardy medıajobalardy jasaýǵa úıretetin «Jastar media» jobasy da bar.
Qaraǵandy oblysy
