Konferensııaǵa dúnıe júzindegi joǵary oqý oryndarynyń zertteýshileri men «Springer» halyqaralyq ǵylymı basylymdar uıymynyń jaýapty ǵalymdary qatysty. Olar «Mekteptegi áleýmettik pedagogtiń róli», «Kásipkerlikti damytý úshin pánaralyq baılanys qurý maqsatyndaǵy bilim berý tehnologııalarynyń sınergııasy» taqyryptary arqyly fızıkalyq múmkindigi shekteýli jandar ómirin jańa tehnologııa jetistikteri arqyly jeńildetý, sondaı-aq bilim berý salasynda aqparatty tehnologııany qoldaný týraly tujyrymdaryn jasady.
Jıyndy ýnıversıtet basqarma tóraǵasy-rektor mindetin ýaqytsha atqarýshy Gúljan Súgirbaeva men «Springer»-diń Londondaǵy jaýapty redaktory Anında Boýz quttyqtaý sózben ashty. Nazarbaev ýnıversıtetiniń professory Prashant Djamýal, Chehııanyń Bilim jáne áleýmettik ǵylymdar ınstıtýty ókili Tomas Chek, «GR Scholastic» uıymynyń jáne Úndistannyń Saýda-ónerkásiptik bilim palatasynyń dırektory, professor Amıt Djoshı «Mekteptegi áleýmettik pedagogtiń róli», «Kásipkerlikti damytý úshin pánaralyq baılanys qurý maqsatyndaǵy bilim berý tehnologııalarynyń sınergııasy» taqyryptarynda baıandama oqydy.
«Ýnıversıtetimizde AICTC-2024 konferensııasy bastaldy. Jańa tehnologııadaǵy jetistikter men zertteýlerdi saralaıtyn bul jıyn Qazaqstanda alǵash ret jáne О́zbekáli Jánibekov atyndaǵy OQPÝ-da ótip jatqanyn aıta ketý kerek. Buǵan deıingi konferensııalar Brıtanııada, Mysyrda, Malaızııada, Dýbaıda uıymdastyrylǵan. Konferensııaǵa álemde ózekti qoldanbaly zertteýlerimen oıyp oryn alǵan JOO-dan, sondaı-aq ǵylymda artyq tanystyrýdy qajet etpeıtin «Springer» halyqaralyq ǵylymı basylymdar uıymynyń jaýapty ǵalymdary qatysyp otyr. Jańa tehnologııa jetistikteri men zertteýleri álemde tek adamzat qundylyǵyna, ortaq ıgilikterge qyzmet ete bersin» dedi G.Súgirbaeva.
Alqaly jıynda bilim men ǵylymǵa qushtar jastar izdenýshi bilim berýde jańa tehnologııany qoldanýdyń ózekti máseleleri men sońǵy jańalyqtaryna qanyqty. Iriktelgen maqalalar Qazaqstan, Japonııa, Qytaı, Mysyr, Malaızııa, Kosovo, Brazılııa, Sıngapýr, Chehııa, Efıopııa, Brıtanııa, Irak, Indonezııa, Bangladesh, Polsha, Úndistan, Gana, AQSh-tan kelip túskenin eskersek, bul konferensııa túrli geografııalyq aımaqtardyń tájirıbesi men zertteýlerin bir arnaǵa toǵystyrdy.
Budan keıin sheteldik qonaqtarǵa arnaıy kádesyılar tabystalyp, ýnıversıtettiń «Dombyra» úıirmesine qatysýshy ónerpazdar kúıi oryndaldy. Al túske qaraı qatysýshylar seksııalyq májiliste О́zbekáli Jánibekov atyndaǵy OQPÝ ǵylymı jumystar jáne ınnovasııalar jónindegi prorektory Erjan Kerimbekovtiń moderatorlyǵymen ótken seksııalyq májiliste ǵylymı zertteýlerdi talqylady.
«Halyqaralyq konferensııadan kóp nárse úırenip jatyrmyz. Jalpy, Úndistan – IT tehnologııasy boıynsha aldyńǵy orynda turǵan memleketterdiń biri. Máselen, Google kompanııasynyń bas dırektory – úndi azamaty. Búgingi tańda bizdiń el halyqaralyq kelisimder negizinde IT tehnologııasyn damytýǵa qaryshty qadam jasap jatyr. Osy konferensııa aıasynda eki eldiń ǵylymı áriptestigi boıynsha kelisimder jasaldy. Soǵan sáıkes arnaıy baǵdarlama sheńberinde Shymkenttiń stýdentteri doktorantýra men bakalavrıat deńgeıinde Úndistannyń bedeldi oqý oryndarynda oqý-praktıkalyq taǵylymdamadan ótetin boldy. О́z kezeginde Úndistannyń da stýdentteri biz turǵan ýnıversıtette eki jyl oqýyn jalǵastyra alady. Bir biletinim, Qazaqstannyń bilimdi jastary sandyq tehnologııany meńgerý jaǵynan álemde kez kelgen eldiń ókilderimen básekelesýge qabileti jetedi. Ony men halyqaralyq baıqaýlarda baıqap júrmin. Qazaqstan maǵan óte qatty unady. Ásirese, jastary óte bilimdi eken. Munyń aldynda saıahat týrymen kelgende jergilikti adamdar qol bulǵap «Siz Úndistannansyz ba?» dep jyly jymııatyn. Bul qazaq halqynyń aqkóńil, meımandos jandar ekenin birden ańǵartady. IT salasy boıynsha álemniń tanymal ǵalymdarynyń basyn qosqan mundaı jıyn tájirıbe almasýda óte mańyzdy. О́ıtkeni Úndistannyń ózi IT mamandaryn osyndaı halyqaralyq tájirıbe almasý arqyly daıarlaıdy», dedi halyqaralyq Sımbıozıs ýnıversıtetiniń ǵalymy doktor K.Kotecha.
Aýqymdy jıyn ǵalymdardyń zertteý taqyrybyn bólisýine ózara jaqyn áriptestik baılanys ornatýyna jol ashty. Seksııalyq májiliste eń úzdik maqalaǵa sertıfıkat tabystaldy. Halyqaralyq konferensııa eki kún boıy jalǵasty.
