Foto: UOK
Olımpıadanyń eki dúrkin júldegeri, álem jáne Azııa chempıony Eldos Smetov elordada ótetin Qazaqstan Barysy Grand Slam týrnıri aldynda qobaljý sezimi bar ekenin jasyrmady.
«Daıyndyq óte joǵary deńgeıde ótip jatyr. Bul olımpıadalyq maýsym bolǵandyqtan, esh aıaldaǵan emespiz. Qazir ulttyq quramada júrgenime 15 jylǵa jýyqtady. Osy ýaqyt aralyǵynda kishkene jaraqattar da boldy. Sonyń saldarynan biraz ýaqyt joǵaltqanymdy da jasyrmaımyn. Qazir qalpyma kelip qaldym. О́z elimizde ótetindikten, qobaljý da bar. Daıynmyn dep oılaımyn. Osy Astanadaǵy iri jarysta osydan toǵyz jyl buryn kúresken ekenmin. 2015 jyly ótken álem chempıonatynda top jardym. Endi, mine, araǵa 9 jyl salyp, olımpıadalyq reıtıngilik týrnırde el namysyn qorǵamaqpyn», dedi Eldos Smetov.
Eldos Smetov óner kórsetetin 60 kg salmaq dárejesinde el quramasynan taǵy 3 dzıýdoshy joldama jolynda tatamıge shyǵady. Alaıda tájirıbeli sportshy Smetov komandalastaryn qarsylas sanamaıtynyn aıtty.
«О́z salmaǵymdaǵy komandalastarymdy ózime qarsylas kórmeımin. Sebebi, olar meniń inilerim. Olarǵa únemi jol kórsetip júremin. Muny óz mindetim dep oılaımyn. Izimnen ergen sportshylar álemdik jarystarda kózge tússe, qatty qýanamyn. Sportshy retindegi pikirim osyndaı. Mine, búgin Maǵjan Shamshadın baýyrym Dýshanbedegi týrnırde kúmis medal aldy. Nurqanat Serikbaev Tbılısıdegi týrnırde top jardy. Osy Astanadaǵy jarystan soń, álem chempıonatyna baratyn quram jasaqtalady. Shyny kerek, meniń olarǵa paıdam tımese, zııanym tımeıdi. Men olarǵa sheberligimmen bólisip, aǵalyq aqylymdy aıtamyn. О́zara sporttyq básekelestik bolǵanymen, ómirde baýyrmyz. Áleýmetti jelide alyp-qashpa áńgime kóp. Bul jerde bárin reıtıng sheshedi. Eshkimdi ataq-abyroıyna qarap aparmaıdy jarysqa. Básekelestik - óte jaqsy dúnıe. Sonyń arqasynda sportshylar ósedi», dedi Eldos Smetov.
