Sýretterdi túsirgen – Jeńis Ysqabaı
Memlekettik keńesshi Erlan Qarın Telegram-daǵy jeke paraqshasynda bul is-sharanyń mańyzyna toqtalyp: «Sergeı Lýganskııdiń esimi berilgen avıabaza onyń týǵan qalasynyń aspanyna qorǵan bolady. Munyń sımvoldyq máni bar. Qazaqstanda batyrlardyń esimi eshqashan umytylmaıdy. Búgingi is-shara – sonyń aıqyn dáleli», dep jazdy.
Eń mańyzdysy – saltanatty is-sharada Sergeı Lýganskııdiń erligi el jadyna sińdi. Jetisýlyqtar Ekinshi dúnıejúzilik soǵysta áýege 390 ret kóterilip, 40-tan astam jaýdyń ushaǵyn qulatqan batyrdyń ómir tarıhyna qanyqty. Eki márte áýe kemesin tikeleı baǵyttap, qarsylasqa soqqy bergen. Dál osyndaı erlik tarıh paraqtarynda uzaq saqtalýǵa tıis. Muny jınalǵan kópshilik te maquldady.
Áýeli Qorǵanys mınıstri, general-polkovnık Rýslan Jaqsylyqov pen óńir ákimi Beıbit Isabaev qaza tapqan batyrlardy bir mınýt únsizdikpen eske alyp, Dańq memorıalyna gúl shoqtaryn qoıdy. Sodan keıin soǵys ardagerleri Tóleýbaı Shektibaev, Sársenbaı Qantarbaı jáne Ermaq Qusaıynovtyń shańyraǵyna baryp, merekemen quttyqtady.
«Jas urpaqty áskerı-patrıottyq tárbıeleýge qosqan úlesi úshin sizderge alǵys aıtqym keledi. Uly maıdanǵa túsip, jaýdyń betin qaıtarǵan erlikterińiz eshqashan umytylmaıdy. Sizderdiń jigerli minezderińiz jastarǵa máńgi ónege bolady», dedi R.Jaqsylyqov.
Ardagerlerge iltıpat kórsetkennen keıin Taldyqorǵandaǵy Qazaqstan Áskerı-áýe kúshteriniń №21751 avıasııalyq áskerı bólimine bardy. El aldyna oblys basshysy men Qorǵanys mınıstrinen bólek, tuńǵysh qazaq ǵaryshkeri, Halyq qaharmany Toqtar Áýbákirov jáne Halyq qaharmany Aıdyn Aıymbetov shyǵyp, jınalǵan qaýymdy merekemen quttyqtady. Batyrdyń bıýstin ashyp, aldyna gúl shoqtaryn qoıdy.
Jınalǵandardy quttyqtaǵan Qorǵanys mınıstri R.Jaqsylyqov Taldyqorǵandaǵy avıabazaǵa Sergeı Lýganskııdiń esimin berý jóninde Prezıdent – Joǵarǵy Bas qolbasshynyń bıyl Atyraý qalasynda ótken Quryltaıda bastama kótergenin jetkizdi. Sondaı-aq bul usynysqa Qarýly Kúshterdiń jeke quramy qoldaý bildirgenin atap ótti. Áskerı qyzmetshilerdiń kúrdeli de jaýapty qyzmetterine tabys tiledi.
Beıbit Isabaev batyrdyń ǵumyr belesine úńilip, quttyqtaý tilegin jerlesterine joldady. «Búgin Keńes odaǵynyń eki márte batyry, áskerı ushqysh Sergeı Lýganskııdiń esimin berý jáne bıýstiniń ashylý saltanatyna kýá bolyp otyrmyz. Sergeı Danılovıch – Ekinshi dúnıejúzilik soǵys kezindegi erligi úshin eki márte Keńes Odaǵynyń Batyry atanǵan jaýynger. Batyrdyń esimin ıelený – áskerı bólim úshin úlken mártebe ári zor jaýapkershilik. Budan bylaı da Otan aldyndaǵy jaýyngerlik paryzdaryńyzdy laıyqty oryndap, el qorǵanysyndaǵy eńbekterińizdiń jemisti bolatynyna senemin», dedi óńir basshysy.
Al jetisýlyqtar erekshe qoshemetpen tórine shyǵarǵan Toqtar Áýbákirov sol dáýirdegi esti oqıǵalardyń tıegin aǵytty. Sý-30 ushaǵymen osy Taldyqorǵan avıabazasynan ushqan kezderin eske aldy.
«Sergeı Lýganskıı – aty ańyzǵa aınalǵan adam. Bala kezimde men ony ózime ustaz tuttym, sonyń úlgisimen tárbıelendim. Avıabazaǵa dańqty batyrdyń esimin berýdiń patrıottyq, tárbıelik mańyzdy zor. Sonymen qatar bul bolashaqta osynda qyzmet etetin jas ushqyshtarǵa da, qazir ushatyndarǵa da eki ese jaýapkershilik júkteıdi. О́ńir turǵyndaryn Jeńis kúni merekesimen taǵy da quttyqtaımyn», dedi T.Áýbákirov.
Saltanatty jıyn sońy merekelik konsertpen jalǵasty. Sonymen qatar qala turǵyndary úshin ortalyq alańda dástúrli sarbaz botqasy kópshilikke usynyldy.
Jetisý oblysy
